Qar kóshkini: Reseıde eki adam qaza taýyp, 10-y joǵalyp ketti
ASTANA. KAZINFORM – Reseıdiń Kabardın-Balqar Respýblıkasyndaǵy Bezengı shatqalynda qar kóshkini júrip, 15 alpınısten turatyn topty basyp qaldy. Eki adam qaza tapty, úsheýi evakýatsııalandy. Taǵy on alpınıstiń taǵdyry ázirge belgisiz, dep habarlaıdy Reseı Tótenshe jaǵdaılar mınıstrliginiń Kabardın-Balqar Respýblıkasy boıynsha Bas basqarmasy.
Mıjırgı taýynyń baýraıynan qar kóshkini túskeni týraly habar 6 qyrkúıekte túsken. Qar massasy belgilengen baǵyt boıynsha júrip kele jatqan alpınıster tobyn basyp qalǵan.
Aldyn ala málimet boıynsha, eki adam qaza taýyp, úsheýi zardap shekken. Taǵy on adam qar kóshkininiń astynda qalǵan.
Oqıǵa ornyna Reseı Tótenshe jaǵdaılar mınıstrliginiń Elbrýs bıik taýly izdeý-qutqarý jasaǵynyń qutqarýshylary men vedomstvonyń óńirlik basqarmasynyń jedel toby jiberildi.
6 qyrkúıek keshindegi jaǵdaı boıynsha qutqarýshylar Mı-8 tikushaǵynyń kómegimen úsh zardap shekken adamdy Nalchık qalasyna evakýatsııalap, olardy Apattar medıtsınasy ortalyǵynyń qyzmetkerlerine tapsyrdy. Eki adamnyń qaza tapqany rastaldy. Taǵy on alpınıstiń taǵdyry ázirge belgisiz.
Іzdeý-qutqarý jumystary jalǵasyp jatyr. Oǵan jetýi qıyn jer bederi men saqtalyp otyrǵan qar kóshkini qaýpi kedergi keltirip otyr.
Іzdeý jumystaryna Reseı Tótenshe jaǵdaılar mınıstrliginiń qosymsha 25 qyzmetkeri jáne Kabardın-Balqar Respýblıkasynyń órtke qarsy-qutqarý qyzmetiniń alty qutqarýshysy tartylmaq. 7 qyrkúıekte kún jaryǵy túsken soń Mı-8 tikushaǵyn qaıta iske qosý josparlanyp otyr.
Eske sala ketsek, bıyl 19 shildede Kabardın-Balqar Respýblıkasynda Elbrýsqa kóterilip bara jatqan 11 jastaǵy bala qaza taýyp, onyń ákesi aýyr jaraqat alǵan.
Keıin Elbrýsta bir táýlik ishinde alty alpınıst qaza tapty. Olardyń beseýi jeti adamnan quralǵan top quramynda taýǵa kóterilgen Bosnııa jáne Gertsegovına azamattary bolsa, taǵy biri basqa toptyń quramyndaǵy reseılik alpınıst bolǵan.
