Reseıde qar kóshkini saldarynan 11 adam qaza tapty
ASTANA. KAZINFORM — Reseıdiń Qabarda-Balqar Respýblıkasyndaǵy Bezengı shatqalynda qar kóshkini saldarynan qaza tapqandar sany 11 adamǵa jetti. Taǵy alty alpınıst iz-túzsiz joǵalǵandar qatarynda, dep habarlaıdy Kazinform agenttiginiń Máskeýdegi menshikti tilshisi.
Qar kóshkini 6 qyrkúıekte Bezengı shatqalyndaǵy Mıjırgı taýynyń baýraıynan túsken.
Reseı tótenshe jaǵdaılar mınıstrligi Qabarda-Balqar Respýblıkasy boıynsha bas basqarmasynyń málimetinshe, top quramynda barlyǵy 33 adam bolǵan. Onyń 10-y ózi tómen túsken, taǵy alty zardap shekken adam medıtsınalyq mekemelerge jetkizilgen.
Qazir izdeý-qutqarý jumystary jalǵasyp jatyr. Operatsııaǵa 56 qutqarýshy jumyldyrylǵan. Joǵalǵan adamdardy izdeýge Reseı tótenshe jaǵdaılar mınıstrliginiń Mı-8 tikushaǵy men kommertsııalyq tikushaq ta tartyldy.
Qutqarý jumystaryna taýly jer bederiniń kúrdeliligi, ekpindi jel jáne qar massalarynyń qaıta syrǵý qaýpi de kedergi keltirip jatyr.
Oqıǵaǵa baılanysty tergeý organdary tekserý júrgizip, adamdardyń qaza bolý sebepteri men mán-jaıyn anyqtap jatyr.
Eske salaıyq, buǵan deıin Qytaıdaǵy alapat selden 43 adam qaza bolyp, 519 adam habar-osharsyz ketkenin habarlaǵan edik.
