Reseıde qar kóshkininen qaza tapqandar sany úsheý boldy
KRASNOıARSK. TASS – QazAqparat – Norılsk qalasyndaǵy taý shańǵysy kesheninde bolǵan qar kóshkini kezinde joǵalyp ketken adamnyń máıiti tabyldy, dep habarlaıdy QazAqparat TASS agenttigine silteme jasap.
Osylaısha qaza tapqandar sany úsheýge jetti. Bul týraly jýrnalısterge RF Krasnoıarsk óńiri jáne Hakasııa boıynsha Tergeý komıtetiniń tergeý basqarmasy málimdedi.
Buǵan deıin izdeý sharalary kezinde qar astynan 14 jasar bala tabylǵan edi. Ol qatty jaraqat alǵan, qazir aýrýhananyń jansaqtaý bóliminde jatyr.
38 jastaǵy áıel men onyń bir jarym jasar balasy mert boldy.
Taǵy bir adam qar qursaýynan óz betinshe shyǵyp, qutqarýshylardy shaqyrǵan. Ol medıtsınalyq kómekke júgindi, biraq aýrýhanaǵa jatqyzý qajet bolmady.
Eske sala ketsek, keshe Reseıdiń Norılsk degen qalasyndaǵy taý shańǵysy kesheninde qar kóshkini júrip, 300 sharshy metr aýmaqty qar basyp qalǵan.
