Reseıde qańtar aıyndaǵy jyldyq ınflıatsııa 6 paıyzdy qurady

ASTANA. KAZINFORM – Reseıde 2026 jylǵy qańtar aıynda jyldyq ınflıatsııa 6 paıyzdy qurady. Bul týraly RF Ekonomıkalyq damý mınıstrligi jarııalaǵan aǵymdaǵy baǵa jaǵdaıy týraly sholýda aıtylǵan, dep habarlaıdy TASS.

Vedomstvo málimetinshe, 2025 jylǵy jeltoqsanda jyldyq ınflıatsııa 5,59 paıyz bolǵan.

– 2026 jylǵy qańtarda tutynýshylyq ınflıatsııa 1,62 paıyzdy qurady. Bul 2026 jylǵy 1 qańtardan bastap qosylǵan qun salyǵynyń bazalyq mólsherlemesiniń 20 paıyzdan 22 paıyzǵa deıin kóterilýimen baılanysty, – delingen sholýda.

Azyq-túlik taýarlary sektorynda baǵa 1,95 paıyzǵa ózgergen. Jemis-kókónis ónimderin eseptemegendegi azyq-túlik baǵasy 1 paıyzǵa artqan. Sonymen qatar sary maı, qant jáne qus eti baǵasynyń tómendeýi tirkelgen.

Azyq-túlikke jatpaıtyn taýarlar segmentinde qańtar aıyndaǵy baǵa ósimi 0,61 paıyzdy qurady. Qyzmet kórsetý sektorynda baǵa 2,33 paıyzǵa ózgergen.

Jalpy alǵanda, qańtar qorytyndysy boıynsha jyldyq ınflıatsııa 6 paıyz deńgeıinde tirkelip, ótken jyldyń jeltoqsanyndaǵy 5,59 paıyzdyq kórsetkishten joǵary boldy.

Aıta keteıik, Reseı men Belarýske eksporttalatyn kóliktiń ýtılalymy ósti.