Reseıde qansha Qazaqstan azamaty jumys istep júr

NUR-SULTAN. QazAqparat – Reseıde 60 myń Qazaqstan azamaty jumys istep júr. Bul týraly Eńbek jáne halyqty áleýmettik qorǵaý mınıstri Birjan Nurymbetov málim etti, dep habarlaıdy QazAqparat tilshisi.

Búgin Parlament Senatynda jumys kúshin tartý taqyrybyna arnalǵan keńeste depýtat Baqytjan Jumaǵulov Qazaqstannyń qansha azamaty shetelde jumys istep júrgenin surady.

Birjan Nurymbetovtyń sózine qaraǵanda, búginde Qazaqstannyń qansha azamaty syrtta jumys istep júrgendiginiń esebi joq.

«El azamatynyń shetelde jumys isteýi úshin memleketten ruqsat suraýy mindetti emes. Sondyqtan ony shekaradan asqanda, ıaǵnı ketip bara jatyp bergen jaýabynan ǵana bilýge bolady. Olar jumysqa nemese qonaqqa bara jatqanynan aıtady», - dedi vedomstvo basshysy.

Sonymen qatar, mınıstr Eýrazııalyq ekonomıkalyq odaq elderinde qansha Qazaqstan azamaty eńbek etip jatqanyn aıtty.

«EAEO-daǵy málimet boıynsha, bes eldiń ishki ister mınıstrlikteriniń derekterine qaraǵanda, Armenııada Qazaqstannyń 15 azamaty, Belarýste – 229, sondaı-aq Reseıde 60 246 azamatymyz jumys isteýde. Al Qyrǵyzstan tıisti málimetti bermegen», - dedi B. Nurymbetov.