Reseıde izdeýde júrgen qylmysker elordada ustaldy
NUR-SULTAN. QazAqparat - Elordalyq polıtseıler Reseıde memleketaralyq izdeýde júrgen qylmyskerdi ustady, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
Búginde elorda aýmaǵynda «Qańǵybas» jedel aldyn alý is-sharasy ótip jatyr.
«Sonyń nátıjesinde 250 adam tekserilip, ártúrli qylmys jasady degen kúdikpen 11 adam anyqtaldy. TMD elderinde izdeýde bolǵan 2 adam anyqtaldy. Іz-túzsiz joǵalǵan 5 adam tabyldy. Turaqty mekenjaıy jáne qujattary joq 30 adam qabyldap-taratý ornyna jetkizildi» delingen habarlamada.
Іs-shara kezinde polıtseıler Quraqty kóshesindegi úılerdiń birinen qylmyskerdi anyqtap, ustady. 32 jastaǵy er adam Reseı Federatsııasynda «densaýlyqqa qasaqana aýyr zııan keltirgeni úshin» memleketaralyq izdeýde júrgen.
Sáýir aıynyń basynan beri polıtsııa qyzmetkerleri izdep jatqan 30-ǵa jýyq qylmysker ustaldy.
