Reseıde izdeýde júrgen 12 qylmysker SQO-dan tabyldy

PETROPAVL. QazAqparat – Soltústik Qazaqstan oblysynyń polıtseıleri bıyl shekaralas yntymaqtastyq aıasynda Reseıde izdeýde júrgen 12 qylmyskerdi óńirde taýyp, ustady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, RF-nyń shekaralas óńirleriniń polıtseıleri izdep jatqan 12 qylmyskerdiń kóbi Omby oblysynda qylmystar jasaǵany úshin izdeýde bolǵan.

Soltústikqazaqstandyq polıtseıler anyqtaǵan úsh qylmyskerge Kalınıngrad, Chelıabi, Vladımır oblystarynda izdeý jarııalanǵan.

Reseılik jedel ýákilder izdestirgen eki soltústikqazaqstandyq zańsyz kásipkerlikpen aınalysty dep kúdiktelgen.

Petropavlda ustalǵan 42 jastaǵy er adam shekarany zańsyz kesip ótkeni úshin reseılik quqyq qorǵaý organdary qyzmetkerleriniń nazaryna ilikken.

Al 26 jastaǵy soltústikqazaqstandyqty Omby oblysynyń jedel ýákilderi esirtki qylmystaryn jasaǵany úshin izdegen.

SQO aýmaǵynda anyqtalǵan qylmyskerler sondaı-aq aýyr dene jaraqattaryn keltirý, bılik ókiline qatysty kúsh qoldaný, zańsyz kóshi-qondy uıymdastyrǵan eken.

SQO PD krımınaldyq polıtsııa basqarmasynyń qyzmetkerleri kúdiktilerdi anyqtap, zańnamamen qarastyrylǵan rásimderdi júrgizdi.

Keıin qajetti málimetter reseılik áriptesterge jiberildi.

«Shekaralas óńirlerdiń Іshki ister mınıstrligi basqarmalarymen birlesip jumys júrgizý máselelerdi jedel sheshýge kómektesedi. Basty mindet – jazadan bultartpaý qaǵıdatyn qamtamasyz etý», - deıdi SQO PD krımınaldyq polıtsııa basqarmasynyń bastyǵy Petr Klımov.