Reseıde iri jalǵan aqsha jasaýshylar jelisi ashyldy
ASTANA. Tamyzdyń 12-si. QazAqparat - Reseılik quqyq qorǵaý organdary «Ońtústik aǵyn» operatsııasyn aıaqtady, onyń barysynda sońǵy kezdegi iri jalǵan aqsha jasaýshylar jelisi ashydy. Jasyryn aqsha jasaýshylar aıyna 50 mıllıon rýblge deıin jalǵan aqsha jasap, ótkizýdi jolǵa qoıǵan, dep habarlaıdy reseılik «Jańalyqtar» agenttigi.
RF ІІM ekonomıkalyq qaýipsizdik depaprtameniniń №10 jedel-izdestirý bıýrosynyń bastyǵy Denıs Sýgrobovtyń aıtýynsha, operatsııa qorytyndysymen myńnan astam qylmystyq is qozǵalǵan. Jalǵan aqshalar Ortalyq, Soltústik-Batys, Sibir, Prıvolje jáne Ońtústik federaldyq okrýgterinde ótkizilip kelgen.
Sýgrobovtyń aıtýynsha, operatsııa maýsymnyń basynda Daǵystanda, Máskeýde, Máskeý túbinde jáne Volgograd oblysynda ótkizilgen. 12 jalǵan aqsha jasaýshy tutqyndalyp, olardan 16 mıllıon rýblden astam jalǵan aqsha tárkilengen.
ІІM atap ótkenindeı, tintý barysynda jalǵan rýbl men dollar basyp shyǵaratyn tórt jeli tabylǵan, arnaıy baspa jabdyqtary, aqshanyń belgilerin salatyn apparattar, myń jáne bes myń rýbl kýpıýra ázirlemeleri, qarý jáne Federaldyq kóshi-qon qyzmetiniń jalǵan mórleri tárkilengen.
Quqyq qorǵaý organdarynyń málimetine qaraǵanda, jasyryn bıznesti uıymdastyrýshy Daǵystannyń 32 jastaǵy turǵyny bolǵan, oǵan eki baýyry kómektesken. Sonymen qatar olardyń quqyq qorǵaý organdarymen jáne banktermen baılanystary bolǵany anyqtaldy.
ІІM atap kórsetýinshe, qylmyskerler aqshany Soltústik Kavkazdaǵy sodyrlar qurylymdaryn qarjylandyrýǵa jiberip otyrǵan.
