Reseıde ınflıatsııa ósimi 2,1%-dy qurady

ASTANA.KAZINFORM — Rosstat dereginshe ótken jyldyń sońynda Reseıde ınflıatsııa 9,52 paıyzdy quraǵan.

2024 jyly baǵa ótken jyldarmen salystyrǵanda jyldam ósti: 2023 jyly — 7,42%, 2022 jyly -11,94% jáne 2021 jyly — 8,39%.

2024 jyldyń sońyna qaraı baǵanyń ósýi resmı boljamdardan joǵary boldy. Ortalyq banktiń 2024 jyldyń qazan aıyndaǵy ınflıatsııa boljamy 8,0-8,5% bolsa, Ekonomıkalyq damý mınıstrliginiń qyrkúıek aıyndaǵy boljamy 7,3% boldy.

Rosstat derekterine sáıkes, Reseı Federatsııasynda azyq-túlik ónimderi 2024 jyly 11,05%-ǵa qymbattaıdy (2023 jyly 8,16%-ǵa óskennen keıin).

Jemis, kókónis ónimderi 2023 jyly 24,19%-ǵa óskennen keıin 2024 jyly 22,09%-ǵa qymbattady.

Sary maı baǵasy 2024 jyly aıtarlyqtaı — 36,23%-ǵa ósti. Sút jáne sút ónimderi — 15,74%-ǵa, balyq jáne teńiz ónimderi — 14,93%-ǵa, kúnbaǵys maıy — 12,69%-ǵa, nan jáne nan ónimderi — 13,22%-ǵa ósti.

Azyq-túlik emes taýarlar baǵasynyń ósýi 2024 jyly 6,12%-dy (2023 jyly — 5,96%) qurady. 2024 jyly benzın baǵasy aıtarlyqtaı ósti — 11,13%-ǵa, dári-dármekter — 10,61%-ǵa, qurylys materıaldary — 7,91%-ǵa ósti.

2024 jyly qyzmet kórsetý 11,52%-ǵa (2023 jyly 8,33%), syrtqy týrızm — 14,82%-ǵa, telekommýnıkatsııa qyzmeti — 13,96%-ǵa, jolaýshylar kóligi — 10,77%-ǵa, turǵyn úı-kommýnaldyq qyzmet tarıfteri — 9,48%-ǵa qymbattady.