Reseıde indetpen kúresten kúızelgender jylqy terapııasymen emdelip júr
NUR-SULTAN. QazAqparat - Koronavırýs qyspaqqa alǵaly beri adamdardyń kúızeliske túsip qalatyn kezderi jıiledi, dep habarlaıdy QazAqparat Habar24kz saıtyna silteme jasap.
Qazir búkil álemde medıtsına qyzmetkerleriniń jumysy qaýyrt ekeni de túsinikti. Aýrýhanada koronavırýs juqtyrǵan naýqastar áli de kóp. Úıde emdelip jatqandar da jeterlik. Kóbine dárigerler kómektesse, keı sátterde eriktiler de járdemdesip júr. Olar óz jumystarynyń qıyn ekenin aıtyp, júıke tozyp, qatty sharshadyq deıdi. Osy rette Reseıde jylqy terapııasy baǵdarlamasy iske qosyldy. Ol kovıd-naýqastarǵa kútim kórsetken medıtsına qyzmetkerleri men volonterlerge arnalǵan. Baǵdarlamaǵa saı atqa miný tegin. Ázirshe 100-ge jýyq adam nıet bildirgen. Atpen serýendegender jylqy terapııasynyń kúızelisten arylýǵa kóp kómegi tıgenin aıtady.
«Baǵdarlamaǵa qatysyp jatqan volonterler koronavırýs juqtyrǵan qart kisilerge jáne ózin-ózi oqshaýlaýǵa májbúr bolǵan turǵyndarǵa kómek kórsetken. Árıne bul adamnyń emotsıonaldyq jaǵdaıyna áser etpeı qoımaıdy. Sondyqtan volonterler men medıtsına qyzmetkerlerine arnap osyndaı baǵdarlamany qolǵa aldyq. Jylqy terapııasynan keıin qatysýshylarymyz kóńil-kúıiniń jaqsarǵanyn aıtady»,-deıdi psıholog Olga Krıvozýbova.
