Reseıde hantavırýsty anyqtaıtyn test bir aptada ázirlendi
ASTANA. KAZINFORM – Reseıde Andes hantavırýsyn anyqtaýǵa arnalǵan test-júıeler qysqa merzimde ázirlendi. Bul týraly UQShU aıasynda ótken halyqaralyq konferentsııada Reseı ǵylym akademııasynyń akademıgi Vasılıı Akımkın málimdedi, dep habarlaıdy TASS.
UQShU-ǵa múshe memleketterdiń bıologııalyq qaýip-qaterlerge den qoıý jónindegi halyqaralyq oqý-jattyǵýlary aıasynda ótken konferentsııada Rospotrebnadzordyń Ortalyq epıdemıologııa ǵylymı-zertteý ınstıtýtynyń dırektory, Reseı ǵylym akademııasynyń akademıgi Vasılıı Akımkın Andes vırýsy týraly aqparat almasý óte jyldam júrgenin atap ótti.
– Ózderińiz kórip otyrǵandaı, 8 mamyr kúni ǵana Shveıtsarııada onyń tolyq genomy alyndy. 11 mamyrda bul derekter tirkeldi, al tolyq genomdy shtammdar nebári alty patsıentten alynǵan edi. Onyń ústine olar 2014 jáne 2018 jyldardaǵy indetter kezinde tirkelgen Chılı men Argentınadaǵy shtammdarǵa óte uqsas boldy. Aqparat almasý óte jedel ótti. Biz bul baǵyttaǵy jumysty birden qolǵa alyp, is júzinde bir aptadan keıin-aq Andes vırýsyn anyqtaýǵa arnalǵan zerthanalyq ádistemege ıe boldyq, – dedi Akımkın.
Ol elde hantavırýstyń basqa túrlerin anyqtaýǵa arnalǵan ádistemeler buǵan deıin de bolǵanyn atap ótti.
Ótken aptada Rospotrebnadzor vedomstvonyń Býndıbýdjıo vırýsyn (Ebola vırýsynyń bir shtammy) anyqtaýǵa arnalǵan reseılik test-júıelerdi ázirlep, olardy Kongo Respýblıkasyna jetkizýdi josparlap otyrǵanyn habarlaǵan bolatyn.
Buǵan deıin krýızdik laınerdegi ólimge ákelgen hantavırýs oqıǵasy jańa vaktsınany ázirleý jumystaryn jedeldetkeni týraly habarlandy.
