Reseıde Germanııada kisi qolynan qaza tapqan Aıgúl Saılybaevaǵa qatysty tekserý bastaldy

ASTANA. KAZINFORM — Reseı Tergeý komıteti Germanııada kisi qolynan qaza tapqan Qazaqstannyń burynǵy sýdıasy Aıgúl Saılybaevaǵa qatysty protsessýaldyq tekserý júrgizip jatyr. 

Atalǵan komıtettiń resmı saıtynda jarııalanǵan málimetke qaraǵanda, federaldy telearnanyń efırinen Germanııa aýmaǵynda Qazaqstannan kelgen áıeldiń óltirilgeni týraly sıýjet kórsetilgen. Sıýjette onyń ólimine enesi men burynǵy kúıeýiniń qatysy bolýy múmkindigi, olardyń Germanııada qylmystyq is qozǵalǵannan keıin Máskeýge qashyp ketý yqtımaldyǵy aıtylǵan. Osyǵan baılanysty marqumnyń ata-anasy Reseı Federatsııasy Tergeý komıtetiniń tóraǵasy Aleksandr Bastrykınge júgingen.

— Sıýjettegi dálelderge baılanysty Reseı Tergeý komıtetiniń Máskeý qalasy boıynsha tergeý organdary protsessýaldyq tekserý júrgizýdi uıymdastyrdy. Reseı Tergeý komıtetiniń tóraǵasy A. Bastrykın Máskeý qalalyq bas tergeý komıtetiniń bastyǵy D. Belıaevke protsessýaldyq tekserýdiń barysy týraly esep berýdi tapsyrdy. Tapsyrmanyń oryndalýy vedomstvonyń ortalyq apparatynda baqylaýǵa alyndy, — delingen komıtet habarlamasynda.

Buǵan deıin elimizdiń Іshki ister mınıstrligi Germanııada kisi qolynan qaıtys bolǵan Aıgúl Saılybaevanyń kúıeýi Aleksandr Dontsov pen onyń anasy Natalıa Dontsovaǵa izdeý salǵanyn jazǵan edik.