Reseıde festıvalde elordalyq parashıýtshiler baq synaıdy
ASTANA. QazAqparat - Astanadaǵy «Dos» táýelsiz ómir» ortalyǵynyń tórt múshesi parashıýtpen sekirýden ótetin halyqaralyq festıvalǵa qatysady, dep habarlaıdy QazAqparat Qazaqstannyń Reseıdegi elshiliginiń saıtyna silteme jasap.
Jarys shildeniń 25-29-y aralyǵynda Reseıdiń Rıazan oblysynda ótedi. Sharaǵa álemniń ár túkpirinen tirek-qımyl júıesine zaqym kelgen múmkindigi shekteýli jandar jınalady.
Qatysýshylar jattyǵýlardy nusqaýshylarmen birge oryndaıdy. Aldaǵy ýaqytta múgedekter arasynda bul sport túrin damytý josparlanyp otyr. Osyǵan oraı «Dos» táýelsiz ómir» múgedekter qoǵamdyq birlestigi men parashıýt sporty federatsııasy memorandýmǵa qol qoıdy. Qurama komanda múshesi Janat Babaǵulovanyń aıtýynsha, aldyńa naqty maqsat qoıa bilseń, oǵan jetýge múgedek arbasy kedergi bola almaıdy.
«Parashıýtpen sekirýdi bala kezden armandaǵanmyn. Tanystarymnyń keńesimen parashıýt klýbyna bardym. Biraz daıyndyqtan soń kókte qalyqtaýǵa múmkindik aldym. Ol kezdegi sezimdi sózben aıtyp jetkizý múmkin emes. Endi, mine, jarysqa ketip baramyn. Talap boıynsha sekirgennen bastap beınetúsirilim jasalady. Qazylar tehnıkańa qarap baǵalaıdy. Shetelde bul sport túri jaqsy damyǵan. Endi, mine, bizde de ony órkendetýge qatysty kelisimder jasalyp jatyr», - dedi Janat Babaǵulova.
