Reseıde energetıkalyq sýsyn men alkogoldi onlaın satý tájirıbesi toqtaýy múmkin
ASTANA. KAZINFORM - Reseı pravoslavıe shirkeýinde energetıkalyq sýsyn, temeki men alkogol ónimderin ınternet arqyly satý jónindegi tájirıbege tyıym salý usynyldy. Bul týraly otbasy, ana men balany qorǵaý máseleleri jónindegi patrıarhııalyq komıssııanyń tóraǵasy, ıereı Fedor Lýkıanov málimdedi, dep habarlaıdy TASS.
Onyń aıtýynsha, atalǵan ónimderdi onlaın formatta satýǵa ruqsat berý Reseı Federatsııasynda olardyń aınalymyn baqylaýdy álsiretýi múmkin. Osy sebepti mundaı eksperımentti iske qosýǵa bolmaıdy.
Buǵan deıin Bıometrııalyq tehnologııalar ortalyǵy seriktesterimen birlesip, bıometrııalyq sáıkestendirýdi qoldaný arqyly 18 jasqa tolǵandarǵa arnalǵan taýarlardy onlaın satý boıynsha pılottyq jobany iske qosýdy josparlap otyrǵanyn habarlaǵan. Sonymen qatar RF Tsıfrlyq damý mınıstriniń orynbasary Oleg Kachanov 2026 jyldyń ekinshi-úshinshi toqsandarynda marketpleıster arqyly reseılik sharapty satý jóninde tájirıbeniń bastalýy múmkin ekenin aıtqan.
Fedor Lýkıanovtyń pikirinshe, energetıkalyq sýsyn, temeki jáne alkogol sekildi ónimderdiń saýdasy qatań baqylaýda bolýy tıis jáne tek oflaın formatta júzege asyrylýy qajet. Ol bıometrııalyq júıe shekteýli qoljetimdiligi bar ónimderdi satý kezinde bolatyn zańbuzýshylyqtardy tolyqtaı boldyrmaıtynyn atap ótti.
Iereı bul pikirin Patrıarhııalyq komıssııa uıymdastyrǵan «Energetıkalyq sýsyn, alkogol men temekini onlaın satý - dástúrli qundylyqtarǵa, ult densaýlyǵyna jáne memlekettik saıasatqa tóngen qaýip. Veıpter - ulttyq demografııalyq saıasat úshin uzaq merzimdi qater» taqyrybyndaǵy beınekonferentsııa barysynda aıtty.
Onyń sózinshe, mundaı eksperımentten eń aldymen kámeletke tolmaǵandar, jastar jáne jas balasy bar otbasylar zardap shegýi múmkin.
Osyǵan baılanysty ol zııandy ónimderdi onlaın satý jónindegi tájirıbeni «RF-daǵy platformalyq ekonomıka týraly» federaldyq zańda tikeleı tyıym salynatyn norma retinde bekitýdi usyndy.
Sondaı-aq Fedor Lýkıanov bıometrııa arqyly saýdany uıymdastyrý jáne marketpleısterdiń rólin kúsheıtý uzaq merzimdi perspektıvada memleket tarapynan ónim aınalymyn baqylaý tetikteriniń álsireýine ákelýi múmkin ekenin aıtty.
Aıta keteıik, Reseı halyqaralyq qońyraýlarǵa tyıym salýdy josparlap otyr.