Reseıde eńbek mıgranttarynyń medıtsınalyq tekserýden ótý merzimi 30 kúnge deıin qysqardy
MÁSKEÝ.KAZINFORM — Reseıde 1 qyrkúıekten bastap eńbek qyzmetin júzege asyrý maqsatynda elge kelgen shetel azamattaryn medıtsınalyq kýálandyrý tártibi kúsheıtildi, dep habarlaıdy agenttik tilshisi.
Kúshine engen zańǵa sáıkes, eńbek mıgranttary elge kirgennen keıin qaýipti ınfektsııalyq aýrýlardyń, AITV-nyń bar-joǵyn jáne esirtki zattaryn qoldaný faktisin anyqtaý úshin medıtsınalyq tekserýden ótýge tıis merzim 90 kúnnen 30 kúnge deıin qysqartyldy.
Reseıde 30 kúnnen astam ýaqyt bolatyn shetel azamattary medıtsınalyq kýálandyrýdan jyl saıyn ótýge mindetteledi. Medıtsınalyq tekserýge jumsalatyn shyǵyndardy mıgranttardyń ózderi nemese olardyń jumys berýshileri óteıdi.
Jańa talaptarǵa sáıkes, medıtsınalyq kýálandyrýdy tek osyǵan ýákiletti medıtsınalyq uıymdar júrgize alady. Medıtsınalyq tekserýden ótý kezinde deldaldyq qyzmet kórsetýge tyıym salynady.
Medıtsınalyq kýálandyrýdan ótý ýaqytsha turýǵa nemese jumys isteýge ruqsat alý, sondaı-aq patentti qaıta rásimdeý úshin mindetti shartqa aınalady.
Tekserý nátıjeleri boıynsha, onyń ishinde elektrondyq formatta medıtsınalyq qorytyndy rásimdeledi. Medıtsınalyq tekserý nátıjeleri Densaýlyq saqtaý salasyndaǵy biryńǵaı memlekettik aqparattyq júıege (EGISZ) engiziledi.
Shetel azamatynyń boıynan qaýipti ınfektsııalyq aýrý, AITV anyqtalǵan nemese esirtki zattaryn qoldanǵany belgili bolǵan jaǵdaıda, medıtsınalyq uıym 24 saǵat ishinde bul týraly Reseı Іshki ister mınıstrligine jáne Rospotrebnadzorǵa habarlaýǵa tıis. Alynǵan aqparat shetel azamatyn elden shyǵarý týraly sheshim qabyldaýǵa negiz bolýy múmkin.
Osylaısha, Reseı bıligi eńbek mıgranttary elge kirgennen keıin olardyń densaýlyq jaǵdaıyn tekserý merzimin qysqartyp, elde 30 kúnnen astam bolatyn shetel azamattaryna turaqty túrde jyl saıynǵy medıtsınalyq baqylaý engizip otyr.
Buǵan deıin Qazaqstan 2026 jyldyń birinshi jartyjyldyǵynyń qorytyndysy boıynsha Ózbekstannan kelgen eńbek mıgranttary úshin negizgi baǵyttardyń birine kirgeni habarlanǵan bolatyn.
