Reseıde eńbek mıgranttaryna qatysty jańa erejeler engizilmek
ASTANA. KAZINFORM — Memlekettik Dýmanyń TMD isteri jónindegi komıteti eńbek mıgranttaryna patentter men ýaqytsha turýǵa ruqsat berý sharttaryn ózgertý týraly zań jobasyn birinshi oqylymda qabyldaýdy usyndy, dep habarlaıdy Kazinform agenttiginiń Máskeýdegi tilshisi reseılik BAQ-qa silteme jasap.
Qujat «Reseıdegi shetel azamattarynyń quqyqtyq jaǵdaıy týraly» zańǵa ózgerister engizýdi kózdeıdi. Jobaǵa sáıkes, eńbek mıgranttary ózderi jáne Reseıde ózderiniń asyraýyndaǵy otbasy músheleri úshin belgilengen mólsherdegi avanstyq salyqty tóleýge mindetti bolady. Mıgrant pen onyń otbasynyń elde bolý merzimi eńbek shartynyń merzimine baılanysty bolady.
18 jasqa tolǵan sheteldik azamattardyń balalary, eger olardyń elde turýynyń ózge de zańdy negizderi bolmasa, 30 kún ishinde Reseı Federatsııasynan ketýge tıis.
Zań jobasy sondaı-aq, eger mıgranttyń tabysy týraly derekter bolmasa nemese onyń jalaqysy otbasy múshelerin eskere otyryp, eń tómengi kúnkóris deńgeıinen tómen bolsa, patentti nemese jumysqa ruqsatty joıýdyń jańa negizderin qarastyrady.
Joǵary bilikti mamandar úshin jeke talaptar belgileý usynylyp otyr. Mundaı jumysshylardyń kópshiligi úshin eń tómengi jalaqy aıyna 717 myń rýbldi (bıylǵy 12 naýryzdaǵy kýrsy boıynsha 6,17-den 4 mln. 423 myń 890 teńge) quraýy tıis. Akkredıttelgen kompanııalardaǵy dárigerler, oqytýshylar, ǵalymdar jáne IT-mamandar úshin — 358,5 myń rýbl (2 mln. 211 myń 945 teńge, 12 naýryzdaǵy kýrsy boıynsha 6,17).
Sondaı-aq ýaqytsha turýǵa ruqsaty nemese turýǵa yqtııarhaty (VNJ) bar sheteldikterge qatysty erejelerdi qataıtý usynylyp otyr. Eger adam bir jyl ishinde on aıdan az jumys istegen bolsa, qujattar berilmeýi nemese joıylýy múmkin.
Buǵan deıin almatylyq polıtseıler sheteldikterdi elden shyǵaryp jibergeni týraly jazǵan bolatynbyz.
