Reseıde eńbek mıgranttaryn elden shyǵarý tizimi keńeıtildi
MÁSKEÝ. KAZINFORM — Reseıde jumys isteýge kelgen sheteldikterdi kóshi-qon salasyndaǵy quqyq buzǵany úshin jaýapkershilikti kúsheıtetin zań kúshine endi. Bul týraly agenttik tilshisi Reseı ІІM Kóshi-qon qyzmetine silteme jasap habarlaıdy.
Normalar 2026 jylǵy 3 qarashada kúshine endi. Aıyppuldan bólek ákimshilik jolmen jer aýdarýdy kózdeıtin ÁQBtK baptarynyń sany 22-den 45-ke deıin ósti.
Atap aıtqanda:
- polıtsııa qyzmetkeriniń nemese memlekettik shekarany kúzetetin áskerı qyzmetshiniń talabyna baǵynbaý;
- usaq buzaqylyq jáne qoǵamdyq tártipti buzý;
- jurtshylyq aldynda ótkiziletin is-sharalardy ótkizý erejesin buzý;
- ınternette adamnyń qadir-qasıetin jáne qoǵamdyq ımandylyqty qorlaıtyn aqparatty taratý;
- jynysy, násili, ulty, tili, jasy, dinge qatynasy jáne ózge de belgileri boıynsha kemsitý;
- natsıstik jáne ekstremıstik rámizderdi nasıhattaý, ekstremıstik materıaldardy taratý;
- tótenshe jaǵdaı, terrorızmge qarsy operatsııa nemese áskerı jaǵdaı rejımin buzý.
Budan bólek, jer aýdarýdy jazanyń basqa túrimen almastyrýǵa bolmaıtyn quqyq buzýshylyqtar tizimi keńeıtildi. Oǵan, atap aıtqanda, esirtki aınalymyna qatysty quqyq buzýshylyqtar engizildi.
Memlekettik Dýma tóraǵasy Vıacheslav Volodın Reseıge keletinder zańdardy saqtaýy, orys tilin bilýi, eldiń mádenıeti men dástúrin qurmetteýi tıis ekenin atap ótti. Bul sharalar qoǵamdyq qaýipsizdikti arttyrýǵa jáne kóshi-qon salasynda tártip ornatýǵa baǵyttalǵan.
Aıta keteıik, Reseı munaı-hımııa ónimderiniń jekelegen túrlerin áketýge tyıym saldy.
