Reseıde eki jasar balany laqtyrǵan Belarýs azamaty májbúrli emdeýge jiberildi

MÁSKEÝ. KAZINFORM — Reseı soty ótken jyldyń maýsym aıynda Sheremetevo áýejaıynda ózgeniń balasyn jerge laqtyrǵan Belarýs týmasy Vladımır Vıtıkovty májbúrli emdeýge jiberý týraly sheshim qabyldady, dep habarlaıdy agenttiktiń menshikti tilshisi.

Sot oǵan medıtsınalyq sıpattaǵy májbúrli sharalardy qoldaný jóninde qaýly shyǵardy. Іs boıynsha sot otyrystary jabyq túrde ótti.

Eske sala keteıik, oqıǵa 2025 jylǵy 23 maýsymda Sheremetevo áýejaıynyń kelý aımaǵynda bolǵan. Aıyptalýshy eki jastaǵy balany kóterip alyp, qatty kúshpen jerge laqtyrǵan.

Atalǵan derek boıynsha «adam óltirýge oqtalý» baby boıynsha qylmystyq is qozǵaldy. Bala aýyr jaǵdaıda aýrýhanaǵa jetkizilip, oǵan omyrtqa men bas súıeginiń synýy, sondaı-aq jabyq bas-mı jaraqaty dıagnozy qoıylǵan.

2026 jylǵy qańtardyń ortasynda Reseıdiń Máskeý oblysy boıynsha Tergeý komıteti osy oqıǵaǵa qatysty qylmystyq isti tergeýdi aıaqtap, aıyptalýshyǵa medıtsınalyq sıpattaǵy májbúrli sharalardy qoldaný máselesin sheshý úshin isti sotqa joldaǵan.

Tergeý barysynda keshendi psıhologııalyq-psıhıatrııalyq saraptama júrgizildi. Onyń nátıjesinde kúdiktiniń esirtkilik masań kúıde bolǵany anyqtaldy, bul onyń aýrý jaǵdaıyn ýshyqtyrýy múmkin. Saraptama qorytyndysyna sáıkes, ol óz áreketteriniń naqty sıpaty men qoǵamdyq qaýiptiligin túsine almaǵan.

Buǵan deıin Almatyda balalar alańynda bala soqqyǵa jyǵylǵany týraly habarlanǵan bolatyn.