Reseıde dúken tonaǵan qylmysker SQO-dan ustaldy
PETROPAVL. QazAqparat – Soltústik Qazaqstan oblysynyń polıtseıleri izdeýde júrgen qylmyskerlerdiń bıyl 20-synyń júrgen jerin anyqtap, ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jaqynda tártip saqshylary reseılik áriptesterine dúken tonaýǵa qatysty qylmysty ashýǵa kómektesti.
Reseıdiń polıtseılerinen sáýir aıynda izdeýde júrgen 24 jastaǵy er adamǵa qatysty baǵdar kelip túsedi. Kúdikti qasyndaǵy tanysymen Amýr oblysy Tynda qalasynda dúken tonaǵan. Ol Reseıge nápaqa tabýǵa ketken SQO-nyń turǵyny bolyp shyqty.
SQO polıtsııa departamenti krımınaldyq polıtsııa basqarmasy qyzmetkerleri birqatar jedel-izdestirý is-sharalaryn júrgizip, izdeýdeginiń júrgen jerin anyqtap, ustady. Kúdikti jaldamaly páterde turǵan jáne ártúrli jumys istegen. Ol qylmys jasaǵanyn moıyndady. Aıtýynsha, sybaılasy ekeýi dúkennen 25 myń rýblge jýyq aqshany oljalaǵan.
«Qylmyskerlerdi izdestirý jumysy departament basshylyǵynyń erekshe baqylaýynda. Basqa memleket aýmaǵynda jazadan qutylmaq bolyp jasyrynyp júrgen kúdiktilerdi izdestirýge basymdyq beriledi. Bul jumys memleketaralyq kelisimder negizinde júzege asyrylady. Jyl basynan soltústikqazaqstandyq polıtseıler jaqyn sheteldegi áriptesterine 12 qylmyskerdi izdep tapty, barlyǵy reseılik polıtseılerdiń suraýy boıynsha», - deıdi SQO polıtsııa departamenti krımınaldyq polıtsııa basqarmasynyń bólim bastyǵy Seıilhan Jumaǵulov.
Jalpy jyl basynan SQO polıtseıleri 20 qylmyskerdi izdep tapty.
