Reseıde dropperler úshin qylmystyq jaýapkershilik engizildi

MÁSKEÝ. KAZINFORM — Reseıdiń Memlekettik Dýmasynyń depýtattary plenarlyq otyrysta dropperler úshin qylmystyq jaýapkershilikti kózdeıtin zań jobasyn qabyldady, dep habarlaıdy Kazinform agenttiginiń tilshisi.

Dropperler — alaıaqtar urlaǵan qarajatty jasyrýǵa jáne qolma-qol aqshaǵa aınaldyrýǵa kómektesetin adamdar.

Jańa túzetýler RF Qylmystyq kodeksiniń 187-babyn (tólem quraldaryn zańsyz aınalymǵa engizý) tolyqtyrady.

Atap aıtqanda, eger adam basqa tulǵaǵa zańsyz operatsııalar jasaý úshin óziniń elektrondyq tólem quralyn berse, ol úshin 300 myń rýblge (shamamen 1 mln 960 myń teńge) deıin aıyppul, ne 480 saǵatqa deıin májbúrli jumys, ne 2 jylǵa deıin túzetý jumystary, ne 2 jylǵa deıin bostandyǵyn shekteý, ne 3 jylǵa deıin májbúrli eńbek, ne dál sondaı merzimge bas bostandyǵynan aıyrý jazasy qarastyrylǵan.

Sol sııaqty jaýapkershilik basqa adamnyń nusqaýymen elektrondyq tólem quralyn paıdalaný arqyly jeke paıda kózdep jasalǵan zańsyz operatsııalar úshin de qoldanylady.

Aıta keteıik, Qazaqstanda da bul baǵytta jumys jalǵasyp jatyr. Buǵan deıin ınternet alaıaqtarǵa qurbandyq taýyp beretin dropperlerge qylmystyq jaza kúsheıtiletini aıtyldy.

Budan bólek Almatyda ınternet-alaıaqtyq úshin satyp alynǵan SIM-kartalar tárkilendi.