Reseıde dollar men eýro jarty jyldyq maksımýmdy jańartty

ASTANA. QazAqparat - Sarapshylar munaı baǵasynyń quldyraýy esebinen rýbldiń qunsyzdanýyn boljaýda. Máskeýlik bırjada eýro baǵamy aqpannan bastap alǵash ret 75 rýbl belgisin eńserdi. Budan buryn dollar baǵamy 67 rýblden asyp, jarty jyldyq maksımýmǵa jetti, dep habarlady Bı-bı-sı.

Rýbl baǵamynyń túsýi munaı qunynyń túsýi aıasynda oryn alýda. Sársenbide Brent markaly munaı barreliniń quny 47 dollardan tómendep ketti. 20 tamyzda tańerteń quldyraý jalǵasty, sóıtip tańerteńgi jaǵdaı boıynsha barreline 46,8 dollar boldy. Munaı quny AQSh-ta munaı qory boıynsha derekterdi jarııalaǵannan keıin kúrt túse bastady. AQSh energetıkalyq aqparat basqarmasynyń derekterine súıensek, shıki munaı qory 14 tamyzda aıaqtalǵan aptada 2,6 mıllıon barrelge ósken. Reseı bıligi bıyl munaıǵa ortasha baǵa barreline 50 dollar bolady dep kútýde.