Reseıde covid-19 aýrýy bir apta ishinde 12,6 paıyzǵa ósti

ASTANA. KAZINFORM - Sońǵy aptada Reseıde koronavırýstyq ınfektsııamen syrqattaný 12,6%  ósti, dep habarlaıdy Rıa Novostı saıty.

"Ótken aptada koronavırýstyq ınfektsııamen syrqattanýshylyq kórsetkishi 100 myń turǵynǵa shaqqanda 18,5-ti qurady jáne ótken aptamen salystyrǵanda 12,6% ósti. Syrqattaný kórsetkishiniń ósýi Reseı Federatsııasynyń 62 sýbektisinde baıqaldy, onyń ishinde 18 óńirde el boıynsha ortasha kórsetkishten tym kóp", - delingen habarlamada.

Bir aptada koronavırýstyq ınfektsııamen aýyrǵan 39 743 adam saýyǵyp ketti, bul aldyńǵy aptamen salystyrǵanda 3%-ǵa az. 8-14 qańtar aralyǵynda bir aptada 150 adam qaıtys boldy.

Reseı Federatsııasynda koronavırýspen aýyratyn 3 746 adam aýrýhanaǵa jatqyzyldy, bul ótken aptamen salystyrǵanda 21,4%-ǵa ósti. Aýrýhanaǵa jatqyzý sanynyń artýy Reseıdiń 54 sýbektisinde boldy, onyń ishinde 25 óńirde el boıynsha ortasha kórsetkishten kóp ósim baıqaldy.