Reseıde CNN telearnasyn taratý toqtatylady
ASTANA. QazAqparat - 2014 jylǵy 31 jeltoqsannan bastap Reseıdiń kábildik jelilerinde amerıkandyq CNN International telearnasyn taratý toqtatylady, dep habarlady Lenta rý.
Bul týraly dúısenbi kúni belgili boldy, Turner Broadcasting System Europe Limited taratýshy kompanııasy tıisti kábildik operatorlarǵa eskertpe-habarlama jiberdi. Reseıde bul arnanyń toqtatylýy sebebi týraly habarlamada eshteńe aıtylmaǵan, CNN telearnasynyń reseılik bólimshesi de túsindirme berýden tartynyp otyr. CNN habarlarynyń toqtatylatyny týraly habarlamany «Vympelkom» jáne «Akado» qýattady. Reseılik operatorlardyń biriniń derekkózi muny Reseı qadaǵalaý komıtetiniń operatorlarǵa tıisti lıtsenzııasyz sheteldik arnalardy taratýǵa tyıym salý jónindegi qatań talabymen baılanystyrady. Derekkózdiń túsindirýinde CNN arnasynda osyndaı lıtsenzııa bolmaǵan, arnany taratý telekompanııa hatynyń negizinde júrgizilip kelgen, onda ruqsat alý jumys júrgizip jatqany aıtylǵan. Taǵy bir operatordaǵy derekóz arnany taratýdy toqtatý Reseıde osy arnadaǵy jarnama satylýynyń tómen bolýy ýájin keltiredi. TASS-tyń habarlaýynsha, Reseı qadaǵalaý komıteti CNN habarlaryn reseılik kábildik jelilerde taratýdy toqtatýǵa qatysy joq ekenin málimdegen. «Telearna habarlarynyń toqtatylýyn CNN aktsıonerlerinen suraý kerek», dedi vedomstvo ókili Vadım Ampelonskıı. CNN Reseıde 1990 jyldardyń basynan beri birneshe jyl boıy «24-shi arnada» taratylyp keldi. Sońǵy jyldary CNN-di kábildik jeliler ǵana taratýda. Budan buryn Reseıde tele- jáne radıokompanııalardyń kapıtalynda sheteldik tulǵalardyń qatysýy shekteýli bolǵandyqtan «Azattyq», «Amerıka daýysy», «Halyqaralyq frantsýz radıosy», sondaı-aq Bı-Bı-sıdiń «Orys qyzmeti» jáne «Nemis tolqyny» radıostansalarynyń jumysy toqtatylǵan bolatyn.
