Reseıde chıkýngýnıa bezgeginiń alǵashqy syrttan ákelingen jaǵdaıy tirkeldi

ASTANA. KAZINFORM — 2025 jyly Reseı Federatsııasynda chıkýngýnıa bezgeginiń alǵashqy syrttan ákelingen jaǵdaıy anyqtaldy. Naýqas ortasha aýyr jaǵdaıda aýrýhanaǵa jatqyzylǵan, dep jazady TASS.

Bul týraly Reseıdiń tutynýshylar quqyqtaryn qorǵaý jáne adam ál-aýqatyn qadaǵalaý qyzmeti — Rospotrebnadzordyń baspasóz qyzmeti habarlady.

— Bıyl Reseı Federatsııasynda chıkýngýnıa bezgeginiń alǵashqy syrttan ákelingen jaǵdaıy anyqtaldy. Rospotrebnadzor buryn bul aýrýdyń basqa elderden ákeliný qaýpi bar ekenin málimdegen bolatyn, sondyqtan vedomstvo mamandary mundaı jaǵdaıǵa daıyn boldy. Qazirgi ýaqytta naýqas ortasha aýyr halde aýrýhanada jatyr, — delingen habarlamada.

Baspasóz qyzmetiniń málimetinshe, naýqas Máskeýge Shrı-Lankadan ushyp kelgen. Kelesi kúni medıtsınalyq kómekke júginip, ınfektsııalyq bólimge Denge bezgegine kúdikpen jatqyzylǵan. Alaıda tekserý nátıjesi chıkýngýnıa vırýsyna oń nátıje kórsetken. Dıagnozdy naqtylaý úshin materıal Rospotrebnadzordyń «Vektor» ortalyǵyna jiberilgen.

Rospotrebnadzordyń málimdeýinshe, Reseıde chıkýngýnıa bezgeginiń taralý qaýpi joq, sebebi bul ınfektsııa tek masa shaǵýy arqyly — transmıssıvti jolmen juǵady. Sonymen qatar, el aýmaǵynda aýrýdy taratatyn masa túrleriniń sany epıdemıologııalyq qaýip tóndirmeıdi.

Vedomstvo barlyq qajetti epıdemııaǵa qarsy sharalardy shuǵyl túrde uıymdastyryp, júrgizgenin aıtty.

Baspasóz qyzmeti atap ótkendeı, Reseı Federatsııasynyń memlekettik shekarasyndaǵy ótkizý beketterinde «Perımetr» júıesi jumys istep tur. Bul júıe ınfektsııalyq aýrý belgileri bar adamdardy, epıdemıologııalyq ahýaly qolaısyz elderden kelgen kezde, anyqtaýǵa múmkindik beredi.

Chıkýngýnıa bezgeginiń belgilerine: dene qyzýynyń kóterilýi, býyndardaǵy qatty aýyrsyný, bulshyqet aýrýy, júrek aıný, álsizdik, bórtpe jáne býyndardyń isinýi jatady.

Aýrýdy Aedes aegypti jáne Aedes albopictus atty eki túrli masa taratady. Bul masalar Denge bezgegin de juqtyra alady. Chıkýngýnıa vırýsyna qarsy vaktsına nemese arnaıy dári-dármek joq.

Budan buryn Qytaıda chıkýngýnıaǵa arnalǵan ekspress-test ázirlengenin jazǵan edik.