Reseıde birqatar iri servıske qatysty aýqymdy tehnıkalyq aqaýlar tirkeldi

ASTANA. KAZINFORM — Sońǵy kúnderi Reseıde birneshe mańyzdy qyzmet pen kompanııany qamtyǵan aýqymdy tehnıkalyq aqaýlar tirkelip otyr, dep habarlaıdy 

Downdetector.

Paıdalanýshylar «Reseı poshtasynyń» jumysyna baılanysty qıyndyqtarǵa tap boldy. Negizgi másele saıt pen onlaın servısterdiń jumysyndaǵy aqaýlarǵa qatysty bolǵan.

Keıinirek federaldyq poshta operatory resmı túrde «Poshta» resýrstarynyń qalypty rejımde jumys istep jatqanyn málimdep, «úreıge boı aldyrmaýǵa» shaqyrdy.

Máseleler týraly «Memlekettik qyzmetter» portalynyń qoldanýshylary da habarlady. Bul platforma azamattarǵa elektrondy túrde memlekettik jáne jergilikti qyzmetterge qol jetkizýge múmkindik beredi.

Shaǵymdardyń basym bóligi Máskeýde tirkelgen. Aqaýlardyń jartysynan kóbi portal saıtynyń jumysymen baılanysty bolǵan.

Buǵan deıin «Aeroflot» kompanııasy da júıesinde tehnıkalyq aqaý bolǵanyn habarlaǵan edi. Sonyń saldarynan júzdegen reıs keıinge qaldyrylǵan nemese toqtatylǵan.

Silent Crow atty hakerlik top «Aeroflotqa» aýqymdy kıbershabýyl jasaǵanyn jarııalap, shamamen 7000 fızıkalyq jáne vırtýaldy serverdiń joıylǵanyn málimdedi.

Alaıda 30 shilde kúni «Aeroflot» áýe kompanııasy ushý kestesi tolyq turaqtandyrylǵanyn habarlady.

Aıta keteıik, 28 shilde kúni tańerteńgi «Aeroflot» IT-júıesine shabýyl Reseı azamattyq avıatsııasy tarıhyndaǵy eń iri kıberıntsıdentterdiń biri retinde baǵalanvp otyr.

Osydan buryn SU1962/1963 «Máskeý — Astana — Máskeý» reısi tehnıkalyq sebepterge baılanysty oryndalmaǵany habarlandy. Bul másele QR Kólik mınıstrliginiń erekshe baqylaýyna alynǵany belgili boldy.

Keshe TSARKA «Aeroflot» jelisine baǵyttalǵan kıbershabýylǵa qatysty málimdeme jasady.