Reseıde biryńǵaı daýys berý kúni aıaqtaldy
ASTANA. KAZINFORM – Reseı Federatsııasy Memlekettik dýmasy toǵyzynshy shaqyrylymynyń depýtattaryn saılaý 18-20 qyrkúıek aralyǵynda ótti, dep habarlaıdy TASS.
Federaldy saılaý okrýginiń tizimine on partııa engizildi: «Birtutas Reseı», Reseı Federatsııasynyń Kommýnıstik partııasy (KPRF), LDPR, «Jańa adamdar», «Ádiletti Reseı», «Reseı zeınetkerler partııasy — áleýmettik ádilettilik úshin», «Reseı kommýnısteri», «Rodına», Reseıdiń «Jasyldar» ekologııalyq partııasy jáne Tikeleı demokratııa partııasy.
Sonymen qatar, 39 aımaqta zań shyǵarýshy jınalystarǵa, sondaı-aq Reseı Federatsııasynyń quryltaı sýbektileriniń joǵary laýazymdy tulǵalaryn saılaý ótti: segiz aımaqta tikeleı saılaý jáne úsh aımaqta aımaqtyq parlamentterdiń saılaýy.
Ekzıt-poll nátıjesine sáıkes, Memlekettik dýmaǵa bes partııa kiredi: «Birtutas Reseı», Reseı Federatsııasynyń Kommýnıstik partııasy, Lıberaldyq-demokratııalyq partııa, «Jańa adamdar» jáne «Ádiletti Reseı».
Reseı Federatsııasynyń Ortalyq saılaý komıssııasy saılaýdyń aldyn ala nátıjesin 21 qyrkúıekte Máskeý ýaqyty boıynsha saǵat 11:00-de jarııalaıdy. Memlekettik Dýma saılaýynyń sońǵy nátıjeleri 25 qyrkúıekten erte jarııalanbaıdy, dep málimdedi Reseı Federatsııasy Ortalyq saılaý komıssııasynyń basshysy Ella Pamfılova.
Eske sala keteıik, Reseı Memlekettik Dýmasyna saılaý partııalardyń ishki saıası kún tártibin ǵana emes, sonymen qatar olardyń syrtqy saıasatqa, sonyń ishinde jaqyn kórshilerimen qarym-qatynasqa kózqarasyn baǵalaýǵa múmkindik beredi.
Reseıde Memlekettik dýma saılaýynda úsh kúndik daýys berý bastalǵanyn jazǵan edik.
