Reseıde bıznestiń qaryzy eki ese ulǵaıdy
MÁSKEÝ.KAZINFORM — Reseılik bıznes tarapynan zeınetaqy men medıtsınalyq qyzmetterge baılanysty tólemder boıynsha qaryz kólemi byltyrǵy kórsetkishten eki ese asyp, 352 mlrd rýblge (shamamen 2 trln 330 mlrd teńge) jetti. Bul týraly Reseı Federatsııasy Esep palatasynyń esebinde aıtylǵan, dep habarlaıdy Kazinform agenttiginiń tilshisi.
Anyqtama: Reseıdegi saqtandyrý jarnalary — bul jumys berýshilerdiń qyzmetkerleriniń zeınetaqy, medıtsına jáne áleýmettik qorǵaýyna mindetti túrde tóleıtin tólemderi. 2023 jyldan bastap bıznes bul jarnalardy biryńǵaı mólsherleme boıynsha — qyzmetkerge tólenetin jalaqynyń 30%-y kóleminde aýdarady (onyń ishinde 22% — zeınetaqyǵa, 5,1% — medıtsınaǵa, 2,9% — basqa áleýmettik járdemaqylarǵa).
Reseılik sarapshylardyń pikirinshe, saqtandyrý jarnalary boıynsha bereshektiń ósýine eń aldymen bıznestiń qarjylyq jaǵdaıynyń nasharlaýy sebep bolyp otyr. Bul, ásirese, shaǵyn jáne orta bızneske tán, munda aınalym qarajaty eń aldymen jalaqy, jalǵa alý jáne taýar satyp alý sııaqty shyǵyndarǵa jumsalady, al saqtandyrý jarnalaryna jetpeı qalady.
Sarapshylar Reseıde qaı óńir men naqty qaı salada saqtandyrý jarnalary boıynsha bereshek kóp ekendigi týraly ashyq málimetter joq deıdi. Olar negizgi qaryz qurylys, saýda jáne qyzmet kórsetý sııaqty kóleńkeli jumyspen qamtý úlesi joǵary salalarda jınalǵan bolýy múmkin dep boljaıdy.
Olardyń pikirinshe, mundaı táýekelder kómir ónerkásibinde de joǵary, óıtkeni bul salaǵa suranystyń tómendeýi, sanktsııalar men logıstıkalyq shekteýler áser etip jatyr. Bul eń aldymen iri shahtalar shoǵyrlanǵan Kemerovo oblysy, Krasnoıar ólkesi jáne Hakasııaǵa qatysty.
Sonymen qatar, sarapshylar týrızm salasynda da osyndaı jaǵdaı bolýy múmkin ekenin atap ótedi.
Sarapshylar bıyl ekonomıkalyq ósim qarqyny baıaýlaıdy dep boljaıdy. Sondaı-aq keıbir sektorlarda quldyraý bolýy múmkin ekenin eskertedi. Bul kompanııalardyń jaǵdaıyn qıyndatyp, jarnalardy ýaqtyly tóleýin tejeıdi.
Buǵan deıin Reseıde sheteldikterdiń baılanyssyz qalýy múmkin ekenin habarlaǵan edik.