Reseıde bilim alǵan jastardyń alǵashqy bóligi Qyzylordaǵa oraldy

Búgingi kúni alǵashqy 74 túlek dıplom alyp, olardyń 43-i magıstratýraǵa tústi. Bul týraly oblys ákimi Qyrymbek Kósherbaev Reseıdiń joǵary oqý oryndarynda bilim alǵan alǵashqy qyzylordalyq túlektermen kezdesýi barysynda aıtty.

Esterińizge sala keteıik, 2014 jyldan bastap Máskeý men Sankt-Peterbýrgtiń ozyq oqý oryndarynda 452 qyzylordalyq stýdent Reseı federatsııasy úkimetiniń granty esebinen bilim alýda. Osy jyly alǵashqy 74 túlek oqýyn támamdady, olardyń 43-i magıstratýrada oqýlaryn jalǵastyrady, 14-i oblystyń iri kásiporyndaryna - «SKZ-Ý» JShS, «Qyzylorda jaryǵy» JShS, «Ansar Servıs» JShS, «Teplotehnık» JShS, mamandandyrylǵan memlekettik mekemelerine qyzmetke ornalasty. Sondaı-aq, ındýstrıaldy-ınnovatsııalyq damý, energetıka jáne turǵyn úı-kommýnaldyq sharýashylyq basqarmalary men jastar resýrstyq ortalyǵyna jáne ózge de mekemelerde eńbek jolyn bastady.

Aıta keteıik, kelesi jyly taǵy 150 túlek oqýyn bitiredi dep kútilýde.

Júzdesý barysynda oblys ákimi Qyrymbek Kósherbaev Reseıde bilim alǵan jastardyń oqýlaryn oıdaǵydaı aıaqtaýymen quttyqtady.

«Ata-babamyz «Týǵan jerge týyńdy tik» dep beker aıtpaǵan, Elbasymyz da «Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» dep aıtyp keledi. Men de óz kezeginde «Týǵan jerge taǵzym etý - paryzym, týǵan jerge qyzmet etý - qaryzym» degen urandy ustanamyn. Bilim alyp, belgili bir mamandyq ıesi atanyp, týǵan jerińe oralǵan qadamdaryń oń bolsyn», - degen tilegin jetkizdi aımaq basshysy.

Óz kezeginde túlekter men olardyń ata-analary qyzylordalyq jastardyń Reseıdiń eń úzdik tehnıkalyq joǵary oqý oryndarynda bilim alýy jáne jumysqa ornalasý múmkindigin jasaǵan oblys basshylyǵyna rızashylyǵyn bildirdi.

«Mundaı múmkindik basqa aımaqtarda bolmaǵanyn atap ótkim keledi. Ózgeler Máskeý men Peterbýrgte oqyp júrgenimizde Syr boıy jastarynyń oqýyna qamqorlyqqa, olardy materıaldyq jáne rýhanı qoldaýǵa qyzyǵa qaraıtyn. Qazir oblystan Máskeýge arzan áýe reısteri uıymdastyrylǵan. Sondaı-aq, oqyp júrgen kezdiń ózinde «Araltuz», «Baıken-U», «Qyzylorda jaryǵy», «Abzal ı K» sııaqty iri kompanııalar jumys usyna bastady. Men «Qyzylorda jaryǵy» JShS-de jumys jasaımyn. Ata-anam men oblys basshylyǵynyń úmitin aqtap, alǵan bilimimdi týǵan jerdiń ıgiligine jaratsam deımin»,-dedi «Qyzylorda jaryǵy» JShS qyzmetkeri Elaman Meńdiqul.

Kezdesýde túlekter oblys ákimine «Orda» jastar qoǵamdyq birlestiginiń kýáligin tabystady. Bul uıym aǵymdaǵy jyldyń tamyz aıynda syrboıylyq jastardyń máselelerin sheshýge jáne reseılik joǵary oqý oryndaryndaǵy stýdentter men túlekterdi biriktirýge arnalyp quryldy.

Bıyl 60-tan astam mektep túlegi Máskeý ulttyq tehnologııalyq zertteýler ýnıversıtetine, K.A. Tımırıazev atyndaǵy Reseı memlekettik agrarlyq ýnıversıtetine, Sankt-Peterbýrg memlekettik ındýstrıaldy tehnologııalar jáne dızaın ýnıversıtetine, Innopolıs ýnıversıtetine jáne Máskeý energetıka ınstıtýtyna tústi. Sonymen birge, syrboıylyq jastarǵa mamandandyrylǵan «Kıberqaýipsizdik» jáne «Protsesterdi matematıkalyq modeldeý» salasynda M.V.Lomonosov atyndaǵy Máskeý Memlekettik ýnıversıtetine jyl saıyn 20 grant jáne Eýrazııalyq ekonomıkalyq qoǵamdastyqtyń Parlamentaralyq Assambleıasy aıasyndaǵy joǵary oqý oryndaryna grant bólinedi. Aqparattandyrý men tehnologııalardy engizý boıynsha Tatarstan Respýblıkasyndaǵy Innopolıs ýnıversıtetinde aqparattyq jáne sandyq tehnologııalar boıynsha jyl saıyn qyzylordalyq túlekterdiń bilim alýyna kelisim jasalǵan. Aldaǵy ýaqytta «Skolkovo» ınnovatsııalyq ortalyǵymen áriptestik ornatý josparlanyp otyr.

Sondaı-aq, az qamtylǵan jáne kóp balaly otbasylardan shyqqan 900-ge jýyq túlek oblys ákiminiń bilim grantyna ıe boldy. 2018 jyly grant sany eki esege artty, onyń 70 paıyzy IT mamandyqtaryna bólinedi.

Bıylǵy jyly oblys ákiminiń 116 stıpendıanty oqýyn bitirdi, onyń jartysy (46 adam) qyzmetke ornalassa, 7 -eýi magıstratýraǵa tústi.