Reseıde bes jyl izdeýde bolǵan alaıaq áıel Petropavldan tabyldy
PETROPAVL. QazAqparat – Soltústik Qazaqstan oblysynyń polıtseıleri «Іzdestirý» respýblıkalyq jedel-aldyn alý is-sharasynyń eki kúninde izdeýde júrgen bes qylmyskerdi tapty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Reseı polıtseıleri alaıaqtyq jasaǵany úshin 55 jastaǵy áıelge izdeý jarııalaǵan. Ivanovsk oblysynyń polıtsııa qyzmetkerleri ony 2016 jyldan beri taba almaı kelgen. Petropavldyń jedel ýákilderi áıeldiń oblys ortalyǵynda júrgen jerin anyqtady.
Al Qyzyljar aýdanynyń tártip saqshylary 38 jastaǵy Qaraǵandy oblysynyń turǵynyn turaqty mekenjaıy joq adamdardyń arasynan tapty. Er adamdy Reseıdiń Voljsk qalasyndaǵy týystary izdestirgen. Aıtýlarynsha, qyrkúıek aıynyń basynda ol Reseıge týystaryna qonaqqa kelýi kerek bolǵan, alaıda barar jerine jetpegen. Mazasyzdanǵan týǵandary polıtsııaǵa aryzdanǵan. Soltústikqazaqstandyq polıtseıler izdeýde júrgen er adamdy taýyp, sheteldegi týystaryna telefon arqyly habarlasýǵa múmkindik berdi. Jaqyn kúnderi ol úıine qaıtýǵa ýáde etti.
Polıtseıler «Іzdestirý» respýblıkalyq jedel-profılaktıkalyq is-sharasy aıasynda jumys istedi. Eki kúnniń ishinde soltústikqazaqstandyq jedel ýákilder bes qylmyskerdi izdep tapty.
«Ótkizilip jatqan aktsııa barysynda izdeýdegi qylmyskerlerdi anyqtaý boıynsha jumys jandandyryldy. TMD elderindegi áriptesterimizben tyǵyz qarym-qatynasta jumys isteımiz. Mundaı yntymaqtastyqtyń jedel is-sharalardy ótkizýde tıimdiligi zor», - deıdi SQO PD bastyǵynyń orynbasary Rýslan Nazarov.
