Reseıde benzın tapshylyǵy qaıta bastalady - sarapshylar
ASTANA. 25 shilde. QazAqparat - Mamandar men naryqqa qatysýshylardyń boljaýynsha, Reseı birneshe aptadan keıin-aq benzın tapshylyǵyna ushyraıdy, dep habarlaıdy RBK.
Qazirgi ýaqytta janarmaı baǵasy aptasyna 4-10 tıynǵa qymbattaýda, bul úrdis budan keıin de jalǵasa bermek, jáne eshkim ony aýyzdyqtaı almaıdy, dep esepteıdi «Kortes» ortalyǵynyń damytý jáne marketıng jónindegi dırektory Pavel Strokov.
«Rosneftıdiń» boljamyna qaraǵanda, Federaldyq monopolııaǵa qarsy qyzmettiń benzın baǵasyn arzandatýǵa kúsh salýy onyń Reseı naryǵyndaǵy tapshylyǵyna alyp kelýi múmkin. Kompanııanyń pikirinshe, Evro-2 normasyna sáıkes benzın aınalymynyń merzimin uzartý arqyly bul qıyndyqtan shyǵýǵa bolady", - dep jazady «RBK daily».
Degenmen, P.Strokov Evro-2 aınalymynyń merzimin uzartý máseleni túbegeıli sheshpeıdi: benzın tapshylyǵy joıylmaıdy degen pikirde. Ol tamyz aıynda birneshe zaýytta josparly jóndeý jumystary júrgiziletinin eske salyp ótti.
