Reseıde benzın Eýroodaq baǵasymen satylmaq
ASTANA. 3 sáýir. QazAqparat - Reseıde benzınniń tómengi baǵasy sarapshylar boljaǵandaı, kóktemniń alǵashqy aıynan ári asa almady, dep habarlady RBK.
Muny munaıshylardyń ózderi de jasyrmaı otyr. Úkimetpen baǵany aýyzdyqtaý jónindegi sharttyń merzimi bitti, avtomobıl otynynyń quny qaıtadan sharyqtaı bastady. Áýeli ol 25 tıynǵa artty. «LÝKOIL» kompanııalarynyń maı quıý stansalarynda osyndaı ósim tirkeldi. Aı-95 benzınine ótken aptada 10 tıyn, al ótken senbi jáne jeksenbi kúnderi taǵy 15 tıyn qosyldy.
«LÝKOIL otynynyń 25 tıynǵa artýy - bul baǵa sharyqtaýynyń bastamasy ǵana, kompanııa odan árige qulash sermeýi múmkin», degen syńaıdaǵy pikirin aıtty «Kortes» kompanııasynyń marketıng jáne damý jónindegi dırektory Pavel Strokov «RBK-Daily» gazetine bergen suhbatynda. Kompanııanyń ózinde de benzınge shekteý budan bylaı bolmaıtynyn joqqa shyǵarmaıdy.
Sóıtip, munaıshylar men ekonomısterdiń boljamyna sáıkes Vladımır Pýtınniń ulyqtaý saltanatynan keıin mamyr aıynda AI-95 benzıniniń ár lıtri qazirgi 28,4 rýbldiń ornyna 30,5 rýblge satylatyn bolady. Degenmen munaıshylar bunymen toqtalmaq emes.
AutoNews.ru agenttigine Reseıdiń iri munaı kompanııalaryndaǵy joǵary shendi derekkózdiń habarlaýynsha, jyl sońyna qaraı Aı-95 benzıniniń lıtri 1,2 eýroǵa jetpek. Bul Eýroodaq elderindegi benzın qunyna shamalasyp qalady. Mysalǵa, Polsha men Lıtvada bir lıtr benzın 1,5 eýro turady - óıtkeni bul elder baǵasy úsh ese arzan benzındi Belarýstan kontrabandalyq jolmen jetkizedi.
Baǵanyń budan ár tómendeýine nemese turaqtanýyna úmit joq. Esterińizge sala keteıik, budan buryn parlamentshiler «ýkraın tájirıbesin» paıdalanyp, benzınge qosymsha aktsızdi eki eseden astam ósirýdi (bir lıtr úshin 3 rýbldiń ornyna 7-8 rýblge) usynǵan bolatyn
Óz kezeginde Vladımır Pýtın: «Aktsızderdi kóterý jol qorlaryn qalyptastyrý qajettiginen týyndap otyr. Bul eleýli resýrstar - kólik salyǵynan aımaqtar 90 mlrd. rýblge jýyq alady, al aktsızderdiń kóterilýinen 93-94 mlrd. dollar alatyn bolady» - degen edi.
Aktsızder de salyqtar sııaqty benzın qunynyń edáýir bóligin quraıdy, sóıtip, onyń qymbattaýyna tikeleı yqpal etedi. Endeshe otynǵa baǵa ósýi jaǵynan Reseı Eýroodaq deńgeıine jetip qalýy kádik.
