Reseıde belgisiz bireý oıyn alańynda balalarǵa oq atqan

Saldarynan 10 jastaǵy bala moınynan jaraqat aldy. Atalǵan oqıǵa boıynsha qylmystyq is qozǵaldy. Bul týraly Tergeý komıtetiniń óńirlik tergeý basqarmasy málimdedi, dep habarlaıdy QazAqparat TASS agenttigine silteme jasap.

«Belgisiz adam Lenıngrad oblysynyń Kıngısepp qalasynyń Oktıabrskaıa kóshesinde ornalasqan balalar alańyna jaqyn jerde buzaqylyq nıetpen qarý retinde belgilenbegen qurylǵyny qoldanyp, alańda oınap júrgen balalarǵa qaraı keminde bir ret oq atqan. Saldarynan on jasar bala moınynan jaraqat aldy»- delingen basqarma habarlamasynda.

Atalǵan fakti boıynsha RF QK 213 baby 2-tarmaǵy boıynsha («Qarýdy nemese qarý retinde paıdalanylatyn zattardy qoldanyp buzaqylyq jasaý») qylmystyq is qozǵaldy.

Tergeý komıtetiniń málimetinshe, oqıǵa jeksenbi kúni bolǵan. Qazirgi tańda jaraqat alǵan bala aýrýhanada jatyr, onyń ómirine esh qaýip tónip turǵan joq.

Polıtsııa oq atqan adamdy izdestirýde. Polıtsııanyń málimetinshe, bala moıynnyń jumsaq tinderinen jaraqat alǵan.