Reseıde balaly bolǵany úshin ıpoteka qaryzdaryn ishinara keshirýdi usyndy
ASTANA. QazAqparat - Depýtattar jas otbasylaryna, eger olarda bala dúnıege kelse, ıpotekalyq nesıesin memleket esebinen ishinara óteýdi usyndy. Odan keıingi árbir bala týýy tólemdi odan da kóbirek qysqartýǵa múmkindik beredi. Bul týraly Lenta.ru «Rossııskaıa gazetaǵa» silteme jasap habarlady.
«Munaı shemany engizýdi bizdiń sarapshylarymyz usynýda», - dep málimdedi Memlekettik dýmanyń áleýmettik saıasat jónindegi komıtetiniń basshysy Olga Batalına. Ol sondaı-aq jas otbasylardyń turǵyn úı problemalaryn sheshý úshin iri kásiporyndar men uıymdardyń qatysýymen turǵyn úı-qurylys kooperatıvteri qurylýy múmkin ekenin aıtty, sondaı-aq jalǵa beriletin turǵyn úıler qurylysy bastaldy.
Usynylyp otyrǵan bastamaǵa Qoǵamdyq palata múshesi Elena Topoleva-Soldýnova túsindirme berdi. «Ata-ana kapıtaly qazirdiń ózinde bul problemanyń bir bóligin sheshýge kómektesýde - ony turǵyn úı jaǵdaıyn jaqsartýǵa paıdalanýǵa bolady. Biraq ta bul qarajat keıde jetkiliksiz bolyp shyǵady. Onyń ústine jas otbasylar materıaldyq jaǵynan jaqsy qamtamasyz etilmegendigin aıtar bolsaq, ıpoteka olardyń qaltasyna aýyr soǵady», - dedi ol basylymǵa.
2015 jylǵy 10 jeltoqsanda úkimet ata-ana kapıtaly baǵdarlamasyn taǵy eki jylǵa uzartty. Sol kúni Eńbek mınıstrligi baǵdarlama boıynsha tólemder 2017 jyldan bastap ındekstelip, 480 myń rýbldi quraıtynyn, al 2018 jyly 505 myń rýblge deıin artatynyn atap ótti.
