Reseıde Aıaz atanyń poıyzy 65 qalany aralaıdy
ASTANA. KAZINFORM — Aıaz atanyń poıyzy 2026 jylǵy 8 qarashada Uly Ýstıýg qalasynan Reseı boıynsha jańa jyldyq saparǵa attanady, dep habarlaıdy RIA Novostı.
Merekelik poıyz 63 kún ishinde Reseıdiń 36 óńirindegi 65 qalany aralaıdy. Al Jańa jyl túnin ıAroslavl qalasynda qarsy alady.
Máskeýde poıyz Kıev vokzalynda 2 jáne 3 qańtar kúnderi eki kún aıaldaıdy. Al Sankt-Peterbýrgte 6 jáne 7 qańtarda Novyı Petergof vokzalynda bolady. Sapar 2027 jylǵy 9 qańtarda aıaqtalady.
Poıyz Aıaz atanyń otany sanalatyn Uly Ýstıýg qalasynan jolǵa shyǵady. Ol taqyryptyq bezendirilgen vagondardan turatyn jyljymaly merekelik rezıdentsııa retinde jasaqtalǵan.
Poıyzda ertegiler aýyly, qýyrshaq teatry, kádesyı dúkeni, Aqshaqar hanshaıymnyń vagony, býfet pen shaı ishýge arnalǵan meıramhana-vagon bar. Sondaı-aq Aıaz atanyń kómekshilerine arnalǵan jatyn vagondar qarastyrylǵan.
Keıbir oıyn-saýyq baǵdarlamalary poıyz aıaldaǵan kezde barlyq kelýshige qoljetimdi bolady. Al ózge baǵdarlamalarǵa qatysý úshin bıletti aldyn ala satyp alý qajet.
Aıaz atanyń poıyzy Reseı boıynsha alǵashqy saparyn 2021 jylǵy 5 jeltoqsanda bastaǵan.
Aıta keteıik, Jańa jylda Aıaz Ata men Aqshaqardy úıge shaqyrý qyzmeti keıbir óńirde qaltany qaǵatyny týraly jazǵan bolatynbyz.
