Reseıde avtobýs júrgizýshisi bala usynǵan iri kýpıýrany jyrtyp tastaǵan
ASTANA. QazAqparat - Ýssýrıısk qalasynda qoǵamdyq kólikke qatysty daý shyqty. 16 jasar oqýshynyń jol júrý aqysyna bergen 5 myń rýblin júrgizýshisi alýdan bas tartqan. Keıin aqshany jyrtyp, bir jartysyn ózine qaldyryp, ekinshisin jasóspirimge bergen, dep habarlaıdy jergilikti basylym.
«Bul aqshany balaǵa ata-anasy jol júrýge jáne mektepte qosymsha sabaqtarǵa tóleýge bergen edi. Oqýshy jyrtyq kýpıýrany bankke aparyp aýystyrǵysy kelgen, alaıda qarjy mekemesi kýpıýronyń jartysy bolmaǵandyqtan qabyldamaǵan», dep jazady «Novaıa Kama» gazeti.
Keıin balanyń ata-anasy júrgizýshini izdep taýyp aldy, biraq ol aqshanyń jarty bóligin qaıtarýdan bas tartqan. Ol aqshany beretin usaǵy bolmaǵan soń jyrtyp tastaǵanyn aıtyp aqtalyp, «eger usaq aqshańyz bolmasa, taksımen júrińizder» dep balany aıyptaǵan.
Atalmysh oqıǵany bilgen kólik kompanııasy ata-anadan keshirim surap, isti qaraýǵa ýáde berdi. Olar ata-anaǵa 4 980 rýbl qaıtarǵan, onda jol júrý aqysy alynyp qoıylǵan.
Qazir reseı polıtsııasy isti tekserip jatyr. Júıkesi tozǵan júrgizýshige qatysty «Ózgeniń múlkin qasaqana joıý nemese búldyrý» babymen qylmystyq is qozǵalǵan. Zań oǵan eki jylǵa bas bostandyǵynan aıyrý jazasyn qarastyrady.
