Reseıde aýyr júk kólikterine qatysty jańa erejeler engizildi
MÁSKEÝ.KAZINFORM — Reseıde 1 qyrkúıekten bastap jolaqysyn tólemegen sheteldik júk tasymaldaýshylarǵa elge kirýge jáne elden shyǵýǵa tyıym salynýy múmkin, dep habarlaıdy agenttik tilshisi.
Shekteý salmaǵy 12 tonnadan asatyn júk kólikterine qoldanylady. Tyıym salýǵa aqyly avtomobıl joldarymen júrgeni úshin ótelmegen bereshektiń, sondaı-aq aýyr júk kólikteriniń joldarǵa keltiretin zııanyn óteý tólemi boıynsha qaryzdyń bolýy negiz bolady.
Tıisti ózgerister Reseı Úkimetiniń 2026 jylǵy 29 mamyrdaǵy № 642 qaýlysymen bekitilip, 1 qyrkúıekten bastap kúshine endi.
Bereshektiń bar-joǵyn memlekettik shekaradaǵy ótkizý pýnktterinde keden organdarynyń qyzmetkerleri tekseredi. Aqparat Memlekettik jáne mýnıtsıpaldyq tólemder jónindegi memlekettik aqparattyq júıeden (GIS GMP) vedomstvoaralyq elektrondyq ózara is-qımyldyń biryńǵaı júıesi arqyly naqty ýaqyt rejıminde alynady.
Ótelmegen bereshek anyqtalǵan jaǵdaıda keden organdary kólik quralynyń ári qaraı júrýine tyıym salady. Qaryz ótelgennen keıin tıisti aqparat júıede jańartylyp, tasymaldaýshyǵa shekaradan ótýge múmkindik beriledi.
Jańa erejeler Reseı aýmaǵy arqyly júzege asyrylatyn halyqaralyq avtomobıl tasymaldarynyń barlyq túrine, onyń ishinde elge kiretin, elden shyǵatyn jáne tranzıttik tasymaldarǵa qoldanylady. Sondaı-aq Reseı aýmaǵy arqyly ótetin úshinshi elder arasyndaǵy baǵyttar da qamtylady.
Bul shara halyqaralyq júk tasymalynyń barlyq túrine, sonyń ishinde tranzıttik baǵyttarǵa da qatysty.
Buǵan deıin Qazaqstanǵa júk kólikteriniń ımporty 6,5 ese ósip, naryqta rekord ornaǵany habarlanǵan bolatyn.
