Reseıde ata-anasynyń qamqorlyǵynsyz qalǵan 3 bala Ózbekstanǵa oraldy
TAShKENT. KAZINFORM — Sáýirdiń 29-y kúni kámeletke tolmaǵan úsh bala Máskeýdegi «Altýfevo» áleýmettik ońaltý ortalyǵynyń qyzmetkerlerimen birge Ózbekstanǵa qaıtaryldy. Bul týraly Ózbekstan Ulttyq áleýmettik qorǵaý agenttigi habarlady.
Tashkent qalalyq ishki ister bas basqarmasyna qarasty kámeletke tolmaǵandarǵa áleýmettik-quqyqtyq kómek kórsetý ortalyǵynda balalar úshin barlyq qajetti jaǵdaı jasalǵany atap ótildi. Shuǵyl medıtsınalyq tekserýden ótkizý, psıhologııalyq qoldaý kórsetý jaqsy jolǵa qoıylǵan.
«Adam» («Inson») áleýmettik qyzmet kórsetý ortalyqtary balalardyń jaqyn týystaryn anyqtap, olardy otbasylaryna qaıtarý boıynsha tıisti sharalar qabyldady.
2024 jyldan beri Ózbekstannyń 40-tan astam kámeletke tolmaǵan azamaty respýblıkaǵa ákelinip, otbasylyq ortasyna qaıtaryldy.
Eske sala keteıik, Reseıde ata-anasynyń qamqorlyǵynsyz qalǵan 16 bala Ózbekstanǵa qaıtaryldy.