Reseıde apatqa ushyraǵan MI-8 tikushaǵynyń jolaýshylary aman qaldy
ASTANA. QazAqparat - Habarovsk ólkesinde apatqa ushyraǵan MI-8 tikushaǵynyń ekıpajy baılanysqa shyqty, dep habarlady «Interfaksqa» «Reseı orman sharýashylyǵynyń» baspasóz hatshysy Vladımır Dmıtrıev.
«Qazirgi qolda bar derekterge sáıkes, MI-8 tikushaǵynda bolǵan adamdar baılanysqa shyqty. Tikushaqtyń ózi túgeldeı órtenip ketken», - dedi V.Dmıtrıev.
Bortta bolǵan adamdardyń sany týraly aqparat ta naqtylandy. Habarovsk ólkesiniń óńirlik dıspetcherlik qyzmetiniń bastyǵy Nıkolaı Shkarýpodan alǵan aqparatqa silteme jasaı otyryp Federaldyq orman sharýashylyǵy agenttiginiń baspasóz qyzmetinde Mı-8 tikushaǵynda 14 adam bolǵanyn aıtty.
Ushaq jolaýshylary 11 órt sóndirýshi parashıýtshi desanttar jáne úsh ekıpaj músheleri - «Áýe orman qorǵaý» qyzmetkerleri bolǵan. Olardyń bári aman-esen.
Tikushaq apaty Verhnebýınskıı aýdanyndaǵy Osennıı kentinen 15 shaqyrym qashyqtyqta oryn aldy. «Áýe orman qorǵaý» qyzmetiniń qyzmetkerleri orman órtin sóndirý maqsatynda ushyp shyqqan. Olardy izdeý úshin tikushaq qulaǵan aýdanǵa TJM men órtten qorǵaý organynyń áýe kúshteri shyǵaryldy.
Reseıdiń Qıyr Shyǵys kóliktegi tergeý basqarmasy tikushaqtyń apatqa ushyraý faktisi boıynsha tekserý júrgizýde.
«Zardap shekkender týraly málimetter naqtylanýda», - delingen habarlamada.
Oqıǵa ornyna tergeýshiler men krımınalısterden turatyn jedel tergeý toby jumys júrgizýde, dep jazady Rosbalt.
