Reseıde anasyn qorǵaǵan 13 jastaǵy qyz mas ákesiniń ólimine sebepshi boldy
ASTANA. QazAqparat - Reseıdiń Rostov oblysynda 13 jastaǵy qyzdy ákesiniń ólimine qatysty degen kúdkipen ustady. Tergeýge deıingi málimetter boıynsha, qyz anasyn mas ákesinen qorǵamaq bolyp, qolyna pyshaq alǵan. Bul týraly aımaq boıynsha Tergeý komıtetiniń baspasóz qyzmetinen habarlady, dep jazady ren.tv.
«Tergeý málimetteri boıynsha, 2016 jyldyń 22 sáýirinde shamamen saǵat 23-te 13 jasar qyzdyń ata-anasynyń arasynda janjal týyndap, ákesi anasyna qol tıgizgen. Anasyn qorǵamaq bolǵan jasóspirim qolyna pyshaq alyp, ákesine siltegen. Jábirlenýshi emdeý mekemesine jetkizildi, onda medıtsınalyq kómek kórsetilgenine qaramastan, kóp uzamaı kóz jumdy», - delingen baspasóz qyzmetiniń habarlamasynda.
Qyz ata-anasymen birge jekemenshik úıde turyp kelgen. Bıylǵy jyldyń naýryz aıynda ákesi bas bostandyǵynan aıyrý ornynan oralǵan. Kórshilerdiń aıtýynsha, bul úıde urys-keris jıi bolyp, ákesi spırttik ishimdikti kóp ishetin bolǵan.
Qazirgi kezde er adamdy óltirý faktisi boıynsha qylmystyq is qozǵaý máselesi qarastyrylýda. Birqatar saraptama taǵaıyndaldy.
