Reseıde alǵash ret birjumyrtqaly tórtem dúnıege keldi

ASTANA. KAZINFORM — Reseıdiń Sankt-Peterbýrg qalasynda tórt egiz qyz dúnıege keldi. Bul Reseıde birdeı tórtem týǵan alǵashqy jaǵdaı, dep habarlaıdy Kazinform. 

Sankt-Peterbýrgtegi № 17 perzenthananyń habarlaýynsha, qyzdar júktiliktiń 32 aptasynda týǵan.

Statıstıka boıynsha, monohorıaldy — «birjumyrtqaly» tórtem — 15,5 mln bosanýdyń bireýinde kezdesedi. Elde mundaı erekshe bosaný buryn-sońdy bolmaǵan.

— Bir ýaqytta tórt balany dúnıege ákelý — tórt qoldyń jumysyn onǵa kóbeıtý. Ota jasaıtyn bólmede anestezıolog-reanımatolog mamandar, tájirıbeli operatsııalyq medbıkeler jáne akýsherler brıgadasy boldy, — delingen perzenthananyń jazbasynda.

Qyzdardyń merzimi úshin óte jaqsy kórsetkishtermen týǵany atap ótildi: 1400 g, 38 sm; 1570 g, 41 sm; 1640 g, 41 sm; 1360 g, 37 sm.

Eske salsaq, aqpan aıynda Qytaıdyń Ýhan qalasyndaǵy perzenthanalardyń birinde 24 jastaǵy Dılhýmar Mámetjan ómirge besem ákelgenin jazdyq. 

Sondaı-aq Atyraýda úshem dúnıege kelgeni habarlandy.