Reseıde alǵash ret AIV-men (VICh) aýyratyn naýqasqa júrek aýystyrý otasy jasaldy
ASTANA. KAZINFORM — Sankt-Peterbýrgte AIV-ınfektsııasymen (VICh) aýyratyn patsıentke alǵash ret Reseıde júrek aýystyrý operatsııasy sátti ótkizildi. Bul týraly dúısenbi kúni JITS (SPID) jáne ınfektsııalyq aýrýlar ortalyǵynyń bas dárigeri Tatıana Vınogradova habarlady, dep jazdy Sınhýa.
Dúnıejúzilik JITS-ke qarsy kúres kúnine arnalǵan baspasóz máslıhatynda ol eki aı buryn elde AIV-men aýyratyn patsıentke alǵashqy júrek transplantatsııasy jasalǵanyn atap ótti. Qazirgi tańda patsıent palatada, otanyń nátıjesi jetkilikti deńgeıde sátti ótken.
T.Vınogradovanyń aıtýynsha, AIV-men aýyratyn patsıentter kez kelgen medıtsınalyq mekemede kómek alý quqyǵyna ıe, al antıretrovırýstyq terapııa olardyń ómir sapasyn jáne uzaqtyǵyn arttyrýǵa múmkindik beredi.
Sankt-Peterbýrg JITS jáne ınfektsııalyq aýrýlar ortalyǵynyń Telegram-arnasy habarlaǵandaı, naýqasqa 1,5 jyl buryn jasandy sol jaq qarynshasy ornatylǵan jáne júrek jetkiliksizdiginiń órshýi saldarynan júrek transplantatsııasyna muqtaj bolǵan. Ota V.A.Almazov atyndaǵy Ulttyq medıtsınalyq zertteý ortalyǵynda 12 saǵattan astam ýaqyt júrgizilgen. Transplantatsııa protsedýrasy standartty túrde ótip, sátti aıaqtalǵan.
Dúnıejúzilik JITS-ke qarsy kúres kúni 1 jeltoqsanda atalyp ótetinin eske salamyz. Bul datany 1988 jyly Dúnıejúzilik densaýlyq saqtaý uıymy bekitken.
Aıta keteıik, buǵan deıin Almatyda júrek yrǵaǵy buzylǵan naýqastarǵa alǵash ret CSP ımplanty salynǵanyn jazdyq.
Sondaı-aq Astanada júrek jetkiliksizdigi bar eki patsıentke úsh kameraly kardıostımýlıator ornatyldy.