Reseıde alaıaqtarǵa qarsy jańa joba iske asyrylady

MÁSKEÝ. KAZINFORM - Reseıde memlekettik qurylymdar men kompanııalardyń resmı saıttary retinde jasalatyn, alaıda keıinnen alaıaqtar azamattardyń qupııa sózderi men basqa da jeke málimetterin urlaý úshin qoldanatyn fıshıngtik saıttar men qosymshalarǵa qoljetimdilikti shekteý boıynsha pılottyq joba iske qosylady, dep habarlaıdy Kazinform agenttiginiń tilshisi RF Úkimetiniń baspasóz qyzmetine silteme jasap.

Pılottyq jobany iske asyrý osy jyldyń 4 maýsymynda bastalyp, 2026 jylǵy 1 naýryzda aıaqtalýy josparlanǵan.

Habarlamada jobanyń maqsaty – memlekettik mekeme, kompanııa nemese bankke uqsas domendik ataýy bar jalǵan ınternet-resýrstar men qosymshalardy anyqtap, olardy jedel buǵattaý mehanızmin ázirleý ekeni aıtylǵan.

Jobadaǵy negizgi mindetterdiń biri – alaıaqtyq saıttar men qosymshalardy anyqtap, buǵattaý kezinde ártúrli memlekettik jáne memlekettik emes qurylymdardyń ózara is-qımyl mehanızmderin pysyqtaý, sondaı-aq mundaı mehanızmderdi normatıvtik túrde bekitý boıynsha usynystar daıyndaý.

Reseılik memlekettik organdar tarapynan jobaǵa Tsıfrlyq damý mınıstrligi, ІІM, Federaldyq qaýipsizdik qyzmeti (FQQ), Mádenıet mınıstrligi, Qarjy mınıstrligi, Federaldyq salyq qyzmeti, Rospatent, Reseı Banki jáne Bas prokýratýra qatysady.

Sonymen qatar jobaǵa avtonomdy kommertsııalyq emes uıym – «Ulttyq ınternet-domendi úılestirý ortalyǵy» jáne «Integral» ǵylymı-zertteý ınstıtýty qatysady dep josparlanyp otyr.

Bul joba azamattardy alaıaqtyq áreketterden qorǵaýdyń jańa múmkindikterin usynyp, ınternettegi qaýipsizdikti arttyrýǵa baǵyttalǵan.

Joba «Kıberqaýipsizdik ınfraqurylymy» atty federaldyq jobanyń aıasynda iske asyrylady. Ol jańa ulttyq «Derekter ekonomıkasy jáne memlekettiń tsıfrlyq transformatsııasy» jobasyna kiredi.

Aıta keteıik, áleýmettik jelidegi alaıaqtyqpen kúresý úshin jumys toby qurylady.