Reseıde AI-92 benzıniniń bırjadaǵy baǵasy jańa rekord ornatty

MÁSKEÝ.KAZINFORM - 18 tamyzda Sankt-Peterbýrg bırjasynda Reseıdiń eýropalyq bóligi ındeksi boıynsha AI-92 janar-jaǵarmaı túriniń baǵasy 1,28%-ǵa ósip, tonnasy 71,309 myń rýblge (479 myń 196 teńge, 18 tamyzdaǵy baǵam boıynsha) jetti. Osylaısha jańa baǵa rekordy tirkeldi, dep habarlaıdy agenttik tilshisi.

Aldyńǵy rekord 2023 jylǵy qyrkúıekte ornatylǵan bolatyn, ol kezde kórsetkish tonnasyna 70,52 myń rýblge jetken.

Sonymen qatar, dál osy kúni AI-95 markaly benzınniń baǵasy 1,86%-ǵa qymbattap, tonnasy 80,3 myń rýblge (539 myń 616 teńge) jetti. Eń joǵary kórsetkish — 80,5 myń rýbl 12 tamyzda tirkelgen edi. Dızel otynynyń baǵasy da 0,93%-ǵa ósip, tonnasy 59,274 myń rýbl (398 myń 221 teńge) boldy.

Kóterme baǵanyń ósýin eskere otyryp, vıtse-premer A. Novak Reseı Energetıka mınıstrliginiń qyrkúıek aıyna deıin benzın eksportyna tyıymdy uzartý jónindegi usynysyn qoldady. Bul shekteý óndirýshilerge de qatysty bolmaq. Al treıderlerge, munaı qoımalaryna jáne jylyna 1 mln tonnadan az benzın shyǵaratyn óndirýshilerge tyıym qazan aıyna deıin uzartylýy múmkin.

Osyǵan deıin Qazaqstandaǵy benzın, dızel jáne avtogaz baǵalary týraly jazdyq.