Reseıde 76 jyl buryn opat bolǵan qazaq jaýyngeriniń súıegi tabyldy

ASTANA. QazAqparat - Reseıdiń Lenıngrad oblysynda «Prımırenıe» izdeý jasaǵy qazaqstandyq jaýyngerdiń súıegin tapty, dep habarlaıdy «QazAqparat» HAA Qazaqstannyń Reseıdegi Elshiliginiń baspasóz qyzmetine silteme jasap.

«Lenıngrad oblysynyń Kırov aýdanyndaǵy izdeý jumystary kezinde Gaıtolovo derevnıasynan jumysshy-sharýa qyzyl áskeriniń súıegi tabyldy. Ol balshyqty topyraqtyń astynda, 30 santımetr tereńde jatyr. Onyń qasynda jeke buıymdary: qazansha, qasyq, shyny torsyq, gaztutqysh tabyldy, sondaı-aq oq-dárilerden eki qol granaty bar. Sýretin qosa jiberemin», - deıdi jasaqtyń komandıri Sergeı Barsýkov.

Áskerdiń moıyntumaryndaǵy málimetterge qaraǵanda, ol - 1914 jyly Kókshetaý oblysy, Chıstopol aýdanynyń Garshıno aýylynda týǵan Ábdilqasym Jamanbaev. Jaýynger soǵystyń alǵashqy kúnderi 1941 jylǵy 18 shildesinde Rýzaev aýdandyq áskerı komıssarıaty tarapynan áskerge alynyp, 1942 jylǵy aqpannan bastap iz-túzsiz joǵalǵandar tizimine qosylǵan.

«Soǵystan keıingi jyldarda ákesi Ysmaıylov Áýbákir ony kóp izdedi. Tek 76 jyl ótkennen keıin ǵana súıegi tabylyp otyr. Qazaqstannyń taǵy bir batyry Otanyna oralady dep senemiz. Onyń týystary tabylsa eken», - deıdi izdeýshiler.

Jaýynger týraly olarda basqa málimet joq.