Reseıde 75 jyldan keıin qazaqstandyq jaýyngerdiń súıegi tabyldy
MÁSKEÝ. QazAqparat - Habarsyz ketken jaýyngerdiń jerlengen jeri 75 jyldan keıin tabyldy. Ekinshi dúnıejúzilik soǵys kezinde erlikpen qaza bolǵan jerlesimizdiń zıratyn reseılik izdeýshiler tapty, dep habarlaıdy RF-daǵy Qazaqstan elshiliginiń baspasóz qyzmeti.
Batyrdyń urpaǵyna jaýyngerdiń medalony saltanatty túrde tabystaldy.
Vladımır Kalýgın kóz jasyn jasyra alar emes. 75 jyldan keıin ol atasynyń erlikpen qaza bolǵanyn bildi. Reseılik izdeýshiler kezekti qazba jumystary kezinde jaýyngerdiń qabirin taýyp eline habar beredi.
Vladımır Kalýgın, jaýyngerdiń nemeresi:- Alǵash bilgende eseńgirep qalǵanymyz ras. Aǵam ekeýmiz shyny kerek kóz jasymyzdy jasyra almadyq. Osynsha jyldan keıin babamyzdyń jerlengen jerin bilip otyrmyz. Bul bizdiń áýlet úshin úlken oqıǵa.
Danıl Kalýgın maıdanǵa 37 jasynda attanady. 164-atqyshtar dıvızııasynyń quramynda soǵysqan. 42-niń tamyzynda Tver oblysynyń Bolotıno aýyly mańynda keńes áskeri men fashıster arasynda qııan-keski urys bolady. Sol joly eki jaqtan da soldattar qyrylady. Alaıda bizdiń áskerler jaýdyń tegeýrindi shabýylyn toıtaryp, ólispeı berispeýge bel býǵan.
Soǵystan keıin Danıl Kýlagınniń otbasy qolyndaǵy tam-tum aqparatpen ǵalamtor arqyly atalaryn izdep kóredi. Alaıda áreketteri nátıjesiz edi. Ol iz-túzsiz joǵalǵandar qatarynda bolǵan. Ótken jyldyń kókteminde jaýyngerdiń múrdesi tabylyp, batyrǵa laıyq qurmetpen jergilikti zıratta jerlendi. Al onymen birge tabylǵan jaýyngerlik medalon búgin urpaǵyna tabystaldy.
- Mundaı medalon árbir jaýyngerge berilgen. Onda ol týraly barlyq málimet jazylǵan. Qaıdan, qaı ýaqytta áskerge shaqyrylǵany kórsetiledi. Biz búgin sol qujatty óskeleń urpaq aldynda batyrdyń otbasyna tabystadyq, - deıdi Astana qalasy qorǵanys departamenti basshysynyń mindetin atqarýshy Marat Esenov.
