Reseıde 5G jelisin iske qosýǵa ruqsat berildi
MÁSKEÝ. KAZINFORM — Reseılik mobıldi baılanys operatorlaryna besinshi býyn (5G) baılanys jelilerin iske qosýǵa ruqsat berildi. Tıisti sheshimdi Radıojıilikter jónindegi memlekettik komıssııa (GKRCh) qabyldady, dep habarlaıdy agenttik tilshisi.
MTS, «MegaFon», «T2 Mobaıl» (T2 brendi) jáne «VympelKom» («Bılaın») operatorlary 5G jelilerin buǵan deıin LTE (4G) standarty úshin paıdalanylǵan radıojıilikterde ornalastyra alady.
Sonymen qatar operatorlarǵa 2026 jylǵy 1 qyrkúıekke deıin Reseı aýmaǵyndaǵy baılanys jelilerinde ornatylǵan sheteldik bazalyq stantsııalardy paıdalanýǵa ruqsat berildi. Reseıdiń Tsıfrlyq damý mınıstrliginiń málimetinshe, bul elde jańa mobıldi baılanys standartyn jedel engizýge múmkindik beredi.
«Úlken tórttik» operatoryna 4630-4990 MGts dıapazonynda eni 90 MGts bolatyn jańa radıojıilik jolaqtary da bólindi. Vedomstvonyń baǵalaýynsha, bul joǵary ónimdi baılanys jelilerin damytýǵa jáne jańa tsıfrlyq servısterdi engizýge jaǵdaı jasaıdy.
2027 jyldan bastap operatorlardy otandyq 5G bazalyq stantsııalaryna kezeń-kezeńimen kóshirý josparlanyp otyr. Bul úderis 2031 jyldyń sońyna deıin aıaqtalýy tıis.
GKRCh sheshimine sáıkes, operatorlar mıllıonnan astam turǵyny bar qalalarda qoldanystaǵy jıilikter negizinde 5G jelilerin jaqyn arada iske qosa bastaıdy.
Al 4,63-4,99 GGts dıapazonyndaǵy 5G jelilerin mıllıonnan astam turǵyny bar qalalardyń eń kóp suranysqa ıe oryndarynda ornalastyrý 2028 jyldyń sońyna deıin aıaqtalýy kerek.
Keıin besinshi býyn baılanys jelileriniń qamtý aýmaǵyn úsh jyl ishinde kezeń-kezeńimen keńeıtý kózdelgen.
5G tehnologııasy mobıldi baılanystyń aldyńǵy standarttarymen salystyrǵanda derekterdi joǵary jyldamdyqpen berýge jáne sıgnaldyń kidirisin azaıtýǵa múmkindik beredi. Degenmen bastapqy kezeńde qamtý aýmaǵynyń shekteýli bolýyna jáne ınfraqurylymnyń birtindep damýyna baılanysty paıdalanýshylar jańa tehnologııanyń barlyq múmkindigin birden sezine almaýy múmkin.
Buǵan deıin Qazaqstanda halyq pen bızneske keminde 100 Mbıt/s jyldamdyqpen ınternet usynýdy kózdeıtin «Qoljetimdi ınternet» ulttyq jobasyn iske asyrý jalǵasyp jatqany habarlanǵan bolatyn.
