Reseıde 500 tonna altyn óndirý josparlanyp otyr
MÁSKEÝ. KAZINFORM — Reseıdiń Tabıǵı resýrstar jáne ekologııa mınıstri Aleksandr Kozlov reseılik BAQ-qa bergen suhbatynda 2026 jyly eldegi altyn óndirý kólemin 500 tonnaǵa deıin arttyrý josparlanyp otyrǵanyn málimdedi, dep habarlaıdy agenttik tilshisi.
Mınıstr 2025 jyldyń qorytyndy kórsetkishteri áli de eseptelip jatqanyn atap ótti. Sarapshylardyń aldyn ala baǵalaýynsha, ótken jyly Reseıde shamamen 485 tonna altyn, 2,8 myń tonna kúmis jáne 136 tonna platına tobynyń metaldary óndirilgen.
Boljam boıynsha, 2026 jyly Reseıde altyn óndirý kólemi 480–500 tonnaǵa, kúmis óndirý shamamen 3 myń tonnaǵa, al platına tobynyń metaldaryn óndirý 137 tonnaǵa jetedi.
Osy málimetterge súıensek, altyn óndirý kólemi shamamen 3%-ǵa, kúmis óndirý 7%-ǵa jýyq, al platına tobynyń metaldaryn óndirý shamamen 0,75%-ǵa artady dep kútilýde.
Buǵan deıin Qazaqstanda kúrdeli kenderden altyn alýdyń ınnovatsııalyq tehnologııasy ázirlengeni týraly jazǵan bolatynbyz.
