Reseıde 30 óńirdiń basshysyn saılaıdy
MÁSKEÝ. QazAqparat - Búgin Reseıde óńir basshylaryn saılaý jónindegi Biryńǵaı daýys berý ótýde. Saılaý Reseıdiń 85 óńiriniń 30-ynda ótýde. Bir ǵana aımaq - Ingýshetııada saılaý ótkizilmeıdi.
30 óńirde gýbernatorlar, al 14-inde- zań shyǵarý jınalystarynyń depýtattary saılanady. Sonymen birge qalalar merleri men mýnıtsıpaldyq depýtattar saılaýy ótýde.
Daýys berý máskeý ýaqytymen saǵat 08.00-de bastalyp, 20.00-de aıaqtalady. Saǵat beldeýiniń aıyrmashylyqtaryna baılanysty Reseıde daýys berý 21 saǵatqa sozylady. Alǵashqy saılaý ýchaskeleri máskeý ýaqytymen 08.00-de Magadan oblysynda, Kamchatkada, sondaı-aq Chýkotkada ashyldy. Sońǵy ýchaskeler máskeý ýaqytymen 21.00-de Kalınıngrad oblysynda jabylady.
Ortalyq saılaý komıssııasynyń málimetteri boıynsha, saılaýǵa daýys berý quqyǵy bar 50 mıllıonnan astam azamat qatysýda, 111 myńnan astam úmitker tirkelgen, 63 saıası uıymdar qatysýda.
Máskeýde 18 partııa usynǵan altynshy shaqyrylǵan Máskeý qalalyq dýmasynyń depýtattyǵyna úmitkerler úshin daýys berý ótýde. Máskeý parlamenti bes jylǵa saılanady. Barlyq depýtattar bir mandatty majorıtarlyq okrýgterden saılanady.
Daýys berýdi 3610 saılaý ýchaskesi, onyń ishinde 3414-i - saılaýshylardyń turǵylyqty jerleri boıynsha, 196-synda - olardyń ýaqytsha bolý oryndarynda (emdeý mekemelerinde, tergeý abaqtylarynda) júrgizilýde. Saılaý ýchaskelerinde yqtımal buzýshylyqtardy anyqtaý úshin beınekameralar qoıylǵan, olardy Máskeý qalalyq dýmasyna saılaýdy baqylaıtyn volonterler qadaǵalaýda.
Máskeý meri Sergeı Sobıanın astana turǵyndaryn saılaý ýchaskelerine kelip, óz úmitkerlerine daýys berýge shaqyrdy.
