Reseıde 3 qazaq mektebi ashylady — Sergeı Lavrov
ASTANA. KAZINFORM — Reseıde 3 qazaq mektebi ashylady. Bul týraly elimizdiń Syrtqy ister mınıstri Ermek Kósherbaevpen kezdesýden keıingi brıfıngte RF Syrtqy ister mınıstri Sergeı Lavrov aıtty.
— Joǵary jáne orta bilim berý salasyndaǵy ózara tıimdi yntymaqtastyqty keńeıtýdi quptaımyn. Ózderińiz biletindeı, ótken jyly ál-Farabı atyndaǵy Qazaq ulttyq ýnıversıtetiniń fılıaly jumysyn bastady. Alǵashqy irikteý ótti. Óz kezeginde, Qazaqstanda reseılik joǵary oqý oryndarynyń 8 fılıaly jumys isteıdi, onyń ishinde Máskeý memlekettik halyqaralyq qatynastar ınstıtýtynyń fılıaly da bar. Bul oqý oryndary Qazaqstan basshylyǵynyń keń qoldaýyna ıe. Dıalogymyzdyń kún tártibinde alty birlesken mektep, onyń úsheýin Reseı aýmaǵynda, úsheýin Qazaqstanda salý tur, — dedi Reseı Syrtqy ister mınıstri.
Onyń atap ótýinshe, Reseı Qazaqstannyń negizgi saýda seriktesteri arasynda ekinshi oryn alady. Taýar aınalymyndaǵy shıkizattyq emes komponenttiń úlesi 80 paıyzdan asady. Bul ekijaqty taýar aınalymy qurylymynyń joǵary sapasyn kórsetedi. Reseı Qazaqstan ekonomıkasyna salynǵan sheteldik kapıtal kólemi boıynsha kósh bastap keledi. Qazaqstanda reseılik kapıtaldyń qatysýymen shamamen 19 myń kompanııa tirkelgen.
— Kaspıı mańyndaǵy Aqtaýda Reseıdiń Bas konsýldyǵyn ashý úderisi aıaqtalý kezeńine ótkenin atap óttik. Ózara dostyq ári odaqtastyq rýhta óńirlik jáne halyqaralyq kún tártibindegi ózekti máselelerdi talqyladyq. Eýrazııalyq ekonomıkalyq odaq, UQShU, TMD, ShYU sııaqty ıntegratsııalyq tetikter aıasyndaǵy ózara is-qımylǵa joǵary baǵa berdik, — dedi ol.
Aıta keteıik, búgin Qazaqstan men Reseı Syrtqy ister mınıstrlikteri yntymaqtastyq boıynsha is-sharalar josparyn bekitti.