Reseıde 20 shaqty adam qoldan jasalǵan ishimdikten ýlanyp óldi

ASTANA. QazAqparat – Reseıdiń Nıjnıı Novgorod, Samara jáne Ýlıanovsk oblystarynda sýrrogat alkogol óniminen ýlaný saldarynan 20-ǵa jýyq adam qaıtys boldy, dep habarlaıdy QazAqparat TASS agenttigine silteme jasap.

Aldyn ala málimet boıynsha, tótenshe jaǵdaıdyń oryn alýyna Samara qalasynda óndirilgen «Mıster sıdr» sýsyndary sebep bolǵan.

Rospotrebnadzor basshysy Anna Popova bul ónimdi satylymnan alyp tastaýdy tapsyrdy.

Sýrrogat alkogolden ýlanýdyń alǵashqy faktileri Nıjegorod oblysynda tirkeldi.

Ýlıanov oblysynda 16 adam qaıtys boldy. Aımaq basshysy Alekseı Rýsskıh oblysta barlyǵy 40 adam ýlanǵanyn málimdedi.

Dımıtrovgrad basshysy Andreı Bolshakov óńirde sýrrogat alkogolden zardap shekkender sany 28 adamǵa deıin óskenin habarlady.

Samara oblysynyń Novokýıbyshevskinde sıdr iship ýlanǵan eki áıel qaıtys boldy.

Keıinnen Densaýlyq saqtaý mınıstrligi óńirlik bólimshesiniń baspasóz qyzmetinen jalpy jeti adamnyń aýrýhanaǵa jatqyzylǵany habarlandy.

Ýdmýrtııada alkogolden ýlanýdyń eki oqıǵasy tirkelgen. Ýlanǵan er adam men áıeldiń jaǵdaıy óte aýyr.

Tergeý ýlanǵandardyń barlyǵy «Mıster sıdr» sýsynyn ishkenin anyqtady. Jurt bul sýsyndy «Terrıtorııa pıva» jáne «Bır haýs» jelilerinen quıǵyzyp satyp alǵan.

Ýlıanov gýbernatory tótenshe jaǵdaıdyń oryn alýyna sebep bolǵan alkogol quramynda metanol bolǵanyn málimdedi.

Atalǵan jaǵdaı boıynsha tıisti tergeý amaldary bastaldy. Ónimdi jetkizgen jeke kásipker ustaldy.